High-level meetings in China, President Zardari's visit begins today
اردو انٹرنیشنل (مانیٹرنگ ڈیسک) ڈان نیوزکی خبر کے مطابق صدر مملکت آصف علی زرداری آج چین کے سرکاری دورے پر روانہ ہو رہے ہیں، جہاں وہ اقتصادی و تجارتی تعاون کے فروغ اور خصوصاً سی پیک سے متعلق امور پر اعلیٰ سطحی مذاکرات کریں گے۔ دفتر خارجہ کے مطابق یہ دورہ 25 اپریل سے یکم مئی تک جاری رہے گا۔
بیان کے مطابق صدر زرداری 25 سے 27 اپریل تک ہونان کے شہر چانگشا جبکہ 28 اپریل سے یکم مئی تک ہینان کے شہر سانیا میں قیام کریں گے۔ اس دوران وہ چینی صوبائی قیادت سے ملاقاتیں کریں گے، جن میں دوطرفہ تعلقات، سرمایہ کاری، تجارت اور سی پیک منصوبوں پر پیش رفت کا جائزہ لیا جائے گا۔
دفتر خارجہ کا کہنا ہے کہ یہ دورہ پاک چین اعلیٰ سطحی روابط کی تسلسل کا حصہ ہے اور اس سال دونوں ممالک کے درمیان سفارتی تعلقات کے 75 سال مکمل ہونے کے باعث غیر معمولی اہمیت رکھتا ہے۔ دونوں ممالک اس موقع پر اپنی اسٹریٹجک شراکت داری کو مزید مضبوط بنانے کے عزم کا اظہار بھی کریں گے۔
گزشتہ سال صدر زرداری کے چین کے دورے کے دوران مختلف شعبوں میں تعاون بڑھانے پر اتفاق ہوا تھا، جبکہ سندھ حکومت اور چینی کمپنیوں کے درمیان زراعت، توانائی، دفاع اور ریلوے سمیت مختلف شعبوں میں چھ مفاہمتی یادداشتوں پر دستخط بھی کیے گئے تھے۔
حکام کے مطابق موجودہ دورے میں نئی سرمایہ کاری، صنعتی تعاون اور علاقائی روابط کے منصوبوں پر بھی پیش رفت متوقع ہے، جو پاکستان کی معاشی بحالی میں اہم کردار ادا کر سکتی ہے۔
