آئی سی سی کا بھارت سے عالمی ایونٹ منتقل کرنے پر غور

پاکستان اور بھارت کے درمیان جاری کشیدگی کے باعث انٹرنیشنل کرکٹ کونسل (آئی سی سی) نے بھارت میں شیڈول بڑے عالمی ایونٹس کی میزبانی کے حوالے سے متبادل انتظامات پر غور شروع کر دیا ہے۔

آسٹریلوی میڈیا رپورٹس کے مطابق آئی سی سی 2029 کی چیمپئنز ٹرافی اور 2031 کے ون ڈے ورلڈکپ کے لیے متبادل میزبان ملک کے آپشنز کا جائزہ لے رہی ہے ممکنہ طور پر آسٹریلیا ان عالمی مقابلوں کی میزبانی کے لیے مضبوط امیدوار کے طور پر سامنے آ سکتا ہے۔

رپورٹس میں مزید کہا گیا ہے کہ خطے میں سیاسی تناؤ اور پڑوسی ممالک کے ساتھ کشیدہ تعلقات کے تناظر میں آئندہ بین الاقوامی ایونٹس کے انعقاد میں ممکنہ رکاوٹوں سے بچنے کے لیے پیشگی منصوبہ بندی کی جا رہی ہے۔

اگرچہ مالیاتی اعتبار سے مضبوط حیثیت کے باعث بھارت کو متعدد بڑے ایونٹس کی میزبانی سونپی گئی تھی، تاہم موجودہ حالات کے پیش نظر اس فیصلے پر نظرثانی کا امکان ظاہر کیا جا رہا ہے۔

ذرائع کے مطابق آئی سی سی کسی بھی غیر یقینی صورتحال سے نمٹنے کے لیے متبادل وینیوز کو حتمی شکل دینے پر سنجیدگی سے غور کر رہی ہے تاکہ عالمی کرکٹ شیڈول متاثر نہ ہو۔