ٹی ٹوئنٹی ورلڈ کپ 2026: گروپ اور پاک–بھارت میچ کی تفصیلات سامنے آ گئیں

آئی سی سی ٹی ٹوئنٹی ورلڈ کپ 2026 کے ابتدائی گروپس اور ممکنہ شیڈول کی اطلاعات سامنے آ گئی ہیں 20 ٹیموں کو 4 گروپس میں تقسیم کیا جائے گا، ہر گروپ میں 5 ٹیمیں شامل ہوں گی جبکہ ٹاپ دو ٹیمیں سپر ایٹ مرحلے میں جگہ بنائیں گی۔

غیر سرکاری میڈیا رپورٹس کے مطابق پاکستان اور بھارت کو ایک ہی گروپ میں رکھا گیا ہے اور دونوں ٹیموں کے درمیان ہائی وولٹیج مقابلہ 15 فروری کو کولمبو میں متوقع ہے اسی گروپ میں نیدرلینڈز، نمیبیا اور امریکا کی ٹیموں کے شامل ہونے کا امکان ظاہر کیا گیا ہے۔

ممکنہ گروپس کے مطابق میزبان سری لنکا کا گروپ آسٹریلیا، زمبابوے، آئرلینڈ اور عمان پر مشتمل ہوگا، جبکہ ایک گروپ میں انگلینڈ، ویسٹ انڈیز، بنگلہ دیش، نیپال اور اٹلی کی شمولیت متوقع ہے۔

جنوبی افریقہ، نیوزی لینڈ، افغانستان، یو اے ای اور کینیڈا پر مشتمل گروپ بھی رپورٹ میں تجویز کیا گیا ہے۔

ورلڈ کپ 7 فروری سے 8 مارچ تک ہوگا اور باضابطہ شیڈول کا اعلان 25 نومبر کو متوقع ہے بھارت میں میچز ممبئی، کولکتہ، چنائی، دہلی اور احمدآباد میں جبکہ سری لنکا میں کولمبو اور کینڈی میں کھیلے جائیں گے۔

پاکستان ٹیم اپنے تمام میچز سری لنکا میں کھیلے گی فائنل احمدآباد میں شیڈول ہے، البتہ اگر پاکستان فائنل میں پہنچا تو فیصلہ کن معرکہ کولمبو منتقل کردیا جائے گا سیمی فائنلز ممبئی اور کولکتہ میں رکھے گئے ہیں، تاہم پاکستان کی صورت میں سیمی فائنل سری لنکا میں ہوگا۔