بلاک کی سیاست سے گریز کرتے ہیں،دوست ممالک کے ساتھ متوازن تعلقات پر یقین رکھتے ہیں،آرمی چیف
اردو انٹرنیشنل (مانیٹرنگ ڈیسک) چیف آف آرمی سٹاف جنرل سید عاصم منیر نے امریکی تھنک ٹینکس اور میڈیا ارکان کے ساتھ اہم ملاقات کی، چیف آف آرمی سٹاف نے ملاقات کے دوران علاقائی سلامتی، بین الاقوامی دہشت گردی اور جنوبی ایشیا میں سٹریٹجک استحکام کو برقرار رکھنے کی اہمیت پر پاکستان کے نقطہ نظر کو سامنے رکھا۔
آرمی چیف نے کہا کہ پاکستان جیو پولیٹیکل اور جیو اکنامک دونوں لحاظ سے اہمیت کا حامل ملک ہے اور خود کو کنیکٹیویٹی کے مرکز اور وسطی ایشیا اور گیٹ وے کے طور پر ترقی دینا چاہتا ہے، تاہم، پاکستان بلاک کی سیاست سے گریز کرتا ہے اور تمام دوست ممالک کے ساتھ متوازن تعلقات برقرار رکھنے پر یقین رکھتا ہے۔
جنرل سید عاصم منیر نے روشنی ڈالی کہ پاکستان طویل مدتی ملٹی ڈومین پارٹنرشپ کے ذریعے امریکہ کے ساتھ دوطرفہ روابط کو وسیع کرنے کا خواہاں ہے۔ انہوں نے اس بات پر روشنی ڈالی کہ دورہ امریکہ کے دوران سیاسی اور عسکری قیادت کے ساتھ ان کی بات چیت بہت مثبت رہی ہے اور تعلقات کو مزید مضبوط بنانے کے خواہاں ہیں۔
آرمی چیف نے اس بات پر بھی روشنی ڈالی کہ پاکستان علاقائی استحکام اور عالمی امن و سلامتی کو یقینی بنانے کے لیے کئی دہائیوں سے بین الاقوامی دہشت گردی کے خلاف ایک مددگار کے طور پر کھڑا ہے۔ پاکستان نے دہشت گردی کے خلاف اپنی پائیدار جنگ میں بے مثال خدمات اور قربانیاں دی ہیں اور پاکستان کے عوام کی امنگوں کے مطابق منطقی انجام تک لڑتا رہے گا۔
جنرل سید عاصم منیر نے غزہ میں مصائب کے خاتمے، انسانی امداد کی فراہمی اور خطے میں پائیدار امن کے لیے دو ریاستی حل کے نفاذ کی فوری ضرورت پر بھی زور دیا۔
