اردو انٹرنیشنل (مانیٹرنگ ڈیسک) امریکا سے ڈی پورٹ کیے گئے غیرقانونی تارکین کو لانے والا ایک اور جہازبھارت کے شہر امرتسر پہنچ گیا،جس میں 112 بھارتی موجود تھے۔
ذرائع کے مطابق امریکی صدر ڈونلڈ ٹرمپ کی پالیسی کے تحت غیرقانونی تارکین وطن کے خلاف کریک ڈاؤن شروع کیا گیا ہے، اور کئی ممالک کے لوگ ڈی پورٹ کیے گئے ہیں۔ امریکی ایئر فورس کے طیارے سی 17 گلوب ماسٹر نے اتوار اور پیر کی درمیانی شب امرتسر کے بین الاقوامی ہوائی اڈے پر لینڈنگ کی۔اس پر سوار افراد میں 13 کا تعلق پنجاب سے ہے جبکہ 44 ہریانہ سے تعلق رکھتے ہیں۔
اسی طرح گجرات کے 33، اتر پردیش کے دو اور ہماچل پردیش اور اترکھنڈ کا ایک ایک فرد سوار تھا، جن کو لینے کے لئے ان کے رشتہ دار بڑی تعداد میں وہاں پہنچے تھے۔
بھارت میں امریکا سے ڈی پورٹ کیے گئے افراد کو لانے والا پہلا جہاز پانچ فروری کو پہنچا تھا، جس میں 104 افراد سوار تھے جبکہ دوسرا جہاز ہفتے کو 116 مسافروں کو لے کر پہنچا تھا۔پہلے مرحلے میں پہنچنے والے افراد کو جہاز میں سیٹوں کے ساتھ باندھا گیا تھا اور بھارت پہنچنے کے بعد ہی ان کو کھولا گیا۔ اس واقعے نے انڈیا میں سیاسی تلاطم کو جنم دیا اور اس وقت ایوان میں جاری بجٹ سیشن کے دوران شدید ہنگامہ آرائی دیکھنے کو ملی۔اسی طرح دوسرے جہاز کے ذریعےپہنچے والوں نے بھی ناروا سلوک کے الزامات لگائے تھے۔
حکومت پر تنقید کے بعد وزارت خارجہ امور کے وزیر ایس جے شنکر نے کہا کہ امریکا کے ساتھ بات چیت جاری ہے، کہ ڈی پورٹ کئے جانے والے افراد کے ساتھ برا سلوک نہ کیا جائے۔ان کا یہ بھی کہنا تھا کہ امریکا سے غیرقانونی تارکین کی واپسی کوئی نئی بات نہیں اور کئی سالو ں سے یہ سلسلہ جاری ہے۔
