اردو انٹرنیشنل (اسپورٹس ویب ڈیسک) تفصیلات کے مطابق یوئیفا چیمپیئنز لیگ کے میچ میں بایرن میونخ کے ناک آؤٹ مرحلے میں براہ راست کوالیفائی کرنے کی امیدوں کو شدید دھچکا لگا، کیونکہ فیینورڈ کے ہاتھوں انہیں ایک غیر متوقع شکست کا سامنا کرنا پڑا۔
کھیل کے آغاز سے ہی بایرن کی ٹیم غیر متحرک نظر آئی۔ جبکہ فیینورڈ کی جانب سے سینتیاگو خیمنیز نے بایرن کے گول کیپر مینوئل نیور کو چکمہ دیتے ہوئے پہلے ہاف کے وسط میں میچ کا پہلا گول کیا۔
بایرن کی جانب سے ہیری کین نے برابری کی کوشش کی، لیکن فیینورڈ کے گول کیپر جسٹن بائیلو نے شاندار دفاع کرتے ہوئے ان کی کوشش کو ناکام بنا دیا۔ ہاف ٹائم کے قریب فیینورڈ نے دوسرا گول کیا، جب کیلون سٹینگس کے باکس کے اندر فاؤل ہونے پر پنالٹی دی گئی، اور خیمنیز نے گول کرکے اسکور 0-2 کر دیا۔
دوسرے ہاف میں بایرن نے کھیل میں واپسی کی کوشش کی، لیکن جمال موسیالا کی جانب سے کیے گئے حملے کو فیینورڈ کے گول کیپر بائیلو نے ایک بار پھر ناکام بنا دیا۔ میچ کے آخری لمحات میں فیینورڈ کی جانب سے نے ایاس یوئیدا نے شاندار کھیل کا مظاہرہ کرتے ہوئے تیسرا گول کیا اور فیینورڈ کی فتح کو یقینی بنایا۔
اس شکست کے بعد بایرن میونخ پوائنٹس ٹیبل پر 15 ویں نمبر پر آ گیا ہے اور اب اگلے ہفتے سلوان بریٹیسلاوا کے خلاف ہونے والے اپنے آخری لیگ میچ میں ٹاپ آٹھ میں جگہ بنانے کے لیے جدوجہد کرے گا کیونکہ چیمپئنز لیگ کے لیگ مرحلے میں ٹاپ آٹھ ٹیمیں خود بخود اگلے مرحلے کے لیے کوالیفائی کر جاتی ہیں۔
دوسری جانب، فیینورڈ کی اس فتح نے انہیں ٹاپ آٹھ میں پہنچنے کے مزید قریب کر دیا ہے۔ ڈچ ٹیم اب 11 ویں نمبر پر ہے اور آٹھویں نمبر پر موجود لیورکوزن کے برابر 13 پوائنٹس پر کھڑی ہے۔ فیینورڈ اگلے ہفتے للی کے خلاف کھیلنے کے لیے میدان میں اترے گا۔
بایرن میونخ کے لیے یہ شکست ان کے چیمپئنز لیگ کے سفر میں بڑی رکاوٹ بن سکتی ہے، جبکہ فیینورڈ کی جیت نے ان کے ناک آؤٹ مرحلے میں رسائی کے امکانات کو مزید روشن کر دیا ہے۔
