ترکیہ اور شام میں زلزلے کے شدید جھٹکے، شدت 6.1 ریکارڈ
اردو انٹرنیشنل (مانیٹرنگ ڈیسک) ترکیہ کے صوبے ملاتیا میں زلزلے کے شدید جھٹکے محسوس کیے گئے، جس کی شدت 6.1 ریکارڈ کی گئی، جس کے نتیجے میں متعدد عمارتوں کو نقصان پہنچا، تاہم کسی کے زخمی ہونے کی اطلاع نہیں ہے۔
غیر ملکی خبر رساں اداروں کی رپورٹس کے مطابق زلزلہ پیما مرکز ’یورپین مڈیٹریزن سیسیمولوجیکل سینٹر‘ نے بتایا کہ ترکیہ کے مشرقی علاقوں میں 6.1 شدت کا زلزلہ محسوس کیا گیا ہے۔
زلزلہ پیما مرکز کا مزید کہنا تھا کہ زلزلے کی گہرائی 9کلومیٹر ریکارڈ کی گئی، زلزلے کے جھٹکے شام کے مشرقی علاقوں میں بھی محسوس کیے گئے۔
ملک کی سرکاری خبر رساں ایجنسی نے بتایا کہ زلزلے کے جھٹکے شام کے صوبوں حسقہ، دیر الزور اور حلب میں بھی محسوس کیے گئے۔
اے ایف پی کے مطابق ترکیہ کے وزیر داخلہ علی یرلیکایا نے بتایا کہ مختلف علاقوں میں تین عمارتیں جزوی طور پر تباہ ہو گئیں اور ایمریجنسی سروسز کو کئی درجن افراد کی جانب سے فورن کرکے مدد طلب کی گئی ہے۔
ملاتیا میں مقامی حکام کا کہنا تھا کہ اس مرحلے پر رپورٹ کرنے کے لیے کوئی ’منفی پیش رفت‘ نہیں ہے، جبکہ صوبائی گورنر نے کہا کہ تمام پرائمری اور سیکنڈری اسکول اس دن کے لیے بند رہیں گے۔
ترکیہ کے ٹیلی ویژن اسٹیشنز کی طرف سے نشر تصاویر کے مطابق زلزلے کے جھٹکے محسوس کرتے ہی کئی شہروں کے رہائشی فوری طور پر سڑکوں پر نکل آئے۔
اے ایف پی کے نامہ نگاروں کے مطابق زلزلے کے جھٹکے خطے کے کئی بڑے شہروں میں محسوس کیے گئے، جن میں جنوب مشرق میں تقریباً 140 کلومیٹر (تقریباً 90 میل) کے فاصلے پر واقع دیار باقر بھی شامل ہے۔