تعلیم کے حصول کیلئے فلسطینی میڈیکل طلبا کا پہلا بیچ پاکستان پہنچ گیا
اردو انٹرنیشنل ( مانیٹرنگ ڈیسک) غزہ سے تعلق رکھنے والے 27 فلسطینی طلبا میڈیکل اور ڈینٹل کی تعلیم حاصل کرنے کے لیے پاکستان پہنچ گئے۔
فلسطینی طلبا غزہ ہیلتھ آؤٹ ریچ پروگرام کے تحت علامہ اقبال انٹرنیشنل ائیرپورٹ لاہور پہنچے۔
مصر میں پاکستانی سفارت خانے کے حکام اور الخدمت فاونڈیشن کے ذمہ داران نے فلسطینی طلبہ کوقاہرہ ایئرپورٹ سے رخصت کیا تھا جو فلائٹ جی ایف 764کے ذریعے براستہ بحرین پاکستان پہنچے ہیں۔
ترجمان الخدمت فاونڈیشن کےمطابق الخدمت فاونڈیشن پاکستان کے صدر ڈاکٹرحفیظ الرحمن،نائب صدر ائیر مارشل (ر) ارشد ملک اور چیئرمین الخدمت ہیلتھ سروسز پروفیسرڈاکٹرزاہدلطیف نے سرکاری حکام کے ہمراہ لاہورائیرپورٹ پر فلسطینی طلبا کا پرتپاک استقبال کیا۔
الخدمت فاونڈیشن پاکستان کے صدر ڈاکٹرحفیظ الرحمن نے اِس موقع پر کہا کہ پہلے مرحلے میں غزہ کے 192 فلسطینی طلبا مختلف پروازوں کے ذریعے پاکستان پہنچ رہے ہیں جو الخدمت فاونڈیشن،گلوبل ریلیف ٹرسٹ اور ڈاکٹرز آف رحمان کے تعاون سے پاکستان کے مختلف میڈیکل کالجز اور یونیورسٹیز میں اپنی میڈیکل اور ڈینٹل کی تعلیم جاری رکھیں گے۔
صدر الخدمت نے کہا کہ وہ حکومت پاکستان،فلسطینی سفارت خانے اور مختلف میڈیکل کالجز اور یونیورسٹیز کے شکرگزار ہیں جن کی دلچسپی سے فلسطینی طلبہ اپنی تعلیم جاری رکھ پائیں گے۔
صدر الخدمت فاؤنڈیشن نے کہا کہ مصر، ترکی اور پاکستان سمیت دیگر ممالک میں بھی غزہ کے زیرتعلیم طلبا کی معاونت کا سلسلہ بھی جاری رکھا ہوا ہے۔ پاکستان پہنچنے والے فلسطینی طلبا تعلیم کے ساتھ رہائش، خوراک سمیت دیگر ضروریات کے لیے ہرممکن سہولیات فراہم کریں گے۔