دفتر خارجہ نے نئی دہلی کی ’خفیہ عالمی کارروائیوں‘ پر خطرے کی گھنٹی بجا دی
اردو انٹرنیشنل (مانیٹرنگ ڈیسک ) دفتر خارجہ نے جمعرات کے روز عالمی سطح پر بھارت کی خفیہ کارروائیوں بشمول جاسوسی اور ماورائے عدالت قتل کے خطرناک پھیلاؤ پر تشویش کا اظہار کرتے ہوئے ان اقدامات کو بین الاقوامی قوانین کی صریح خلاف ورزی قرار دیتے ہوئے مذمت کی۔ہفتہ وار میڈیا بریفنگ دفتر خارجہ کی ترجمان ممتاز زہرہ بلوچ نے کہا، ’’بھارت کا جاسوسی اور ماورائے عدالت قتل کا نیٹ ورک عالمی سطح پر پھیل چکا ہے۔‘‘
انہوں نے فنانشل ٹائمز کی ایک رپورٹ پر تبصرہ کرتے ہوئے کہا کہ ، “ہم نے بھارت کی لاپرواہی اور غیر ذمہ دارانہ طرز عمل کی مذمت کی ہے اور ہمیں تشویش ہے، جس کے بارے میں ہمارا خیال ہے کہ یہ بین الاقوامی قانون اور ریاستی خود مختاری کے اقوام متحدہ کے اصول کی واضح خلاف ورزی ہے۔” امریکی حکام نے سکھ علیحدگی پسند گروپتونت سنگھ پنون کے قتل کی سازش کو ناکام بنا دیا۔بائیڈن انتظامیہ نے قتل کی سازش پر دہلی کو اپنی تشویش سے آگاہ کیا ہے۔
یاد رہے کہ ستمبر کے اوائل میں، کینیڈا کے وزیر اعظم جسٹن ٹروڈو نے کہا تھا کہ کینیڈا کی سیکیورٹی ایجنسیاں برٹش کولمبیا میں سکھ علیحدگی پسند رہنما ہردیپ سنگھ نجار کے جون میں ہونے والے قتل سے ہندوستانی حکومت کے ایجنٹوں کو منسلک کرنے کے سنجیدہ الزامات کی تحقیقات کر رہی ہیں۔ کینیڈا نے اپنے ملک سے بھارتی خفیہ سفارت کار کو بھی ملک بدر کر دیا، جس سے یہ ظاہر ہوتا ہے کہ وہ ان الزامات کو کس سنجیدگی کے ساتھ پیش کر رہا ہے۔
