پاکستان میں چیمپئنز ٹرافی کے دورے کا دوسرا مرحلہ شروع

اردوانٹرنیشنل (اسپورٹس ڈیسک) تفصیلات کے مطابق چمکتی دمکتی چیمپئنز ٹرافی نے ہفتے کے روز پاکستان کے دورے کے دوسرے مرحلے کا آغاز شیخوپورہ کے تاریخی ہیران مینار کمپلیکس کے سفر سے کیا۔

اس مرحلے کے دوران ٹرافی کو 14 دنوں میں پاکستان کے 10 شہروں میں لے جایا جائے گا۔

چیمپئنز ٹرافی 2025 سے قبل عالمی ٹرافی کا دورہ پاکستان میں 16 نومبر کو شروع ہوا جس کے بعد ٹرافی کو 26 نومبر سے 26 جنوری تک شریک سات ممالک میں لے جایا گیا۔

اس کے دوسرے مرحلے میں شیخوپورہ کے علاوہ ٹرافی کو بہاولپور، فیصل آباد، حیدرآباد، اسلام آباد، کراچی، لاہور، ملتان، پشاور اور کوئٹہ لے جایا جائے گا۔

ٹرافی 8 فروری کو پاکستان اور نیوزی لینڈ کے درمیان سہ ملکی سیریز کے افتتاحی میچ کے دوران نئے اپ گریڈ شدہ قذافی اسٹیڈیم، لاہور میں بھی نظر آئے گی۔

ان 14 دنوں کے دوران جن اہم مقامات پر ٹرافی لے جائی جائے گی ان میں ملتان کا قلعہ، بہاولپور کا نور محل، پشاور کا ارباب نیاز اسٹیڈیم، کراچی کا نیشنل اسٹیڈیم، حیدرآباد کا نیاز اسٹیڈیم اور فیصل آباد کا اقبال اسٹیڈیم شامل ہیں۔

عالمی ٹرافی کا دورہ 14 فروری کو کراچی میں اختتام پذیر ہوگا۔آ چیمپئنز ٹرافی کا افتتاحی میچ میزبان پاکستان اور نیوزی لینڈ کے درمیان 19 فروری کو ہونا ہے۔