ٹی ٹوئنٹی ورلڈکپ: آئی سی سی کا کینیڈا کرکٹ کے خلاف تحقیقات کا آغاز

انٹرنیشنل کرکٹ کونسل (آئی سی سی) کے اینٹی کرپشن یونٹ نے ٹی ٹوئنٹی ورلڈ کپ 2026 میں کینیڈا اور نیوزی لینڈ کے درمیان کھیلے گئے میچ کے حوالے سے تحقیقات شروع کر دی ہیں۔

غیر ملکی کرکٹ ویب سائٹ کے مطابق یہ تحقیقات ایک ڈاکومنٹری نشر ہونے کے بعد شروع کی گئیں، جس میں کینیڈا کرکٹ میں مبینہ بدانتظامی اور کرپشن کے الزامات سامنے لائے گئے ہیں۔

ڈاکومنٹری میں خاص طور پر کینیڈا کے کپتان دلپریت باجوہ کے ایک اوور کی نشاندہی کی گئی ہے، جس میں انہوں نے نو بال اور وائیڈز سمیت مجموعی طور پر 15 رنز دیے اس اوور کو مشکوک قرار دیا گیا ہے۔

یاد رہے کہ باجوہ کو ایونٹ سے چند ہفتے قبل ہی قیادت سونپی گئی تھی۔

رپورٹ کے مطابق آئی سی سی کا اینٹی کرپشن یونٹ اس کے علاوہ ایک لیک شدہ فون کال کی بھی تحقیقات کر رہا ہے، جس میں ٹیم سلیکشن پر دباؤ اور میچ فکسنگ کے دعوے کیے گئے ہیں۔ آڈیو میں کوچ خرم چوہان نے مبینہ طور پر ان معاملات کا ذکر کیا ہے۔

آئی سی سی کے انٹیگریٹی یونٹ کے جنرل منیجر نے تصدیق کی ہے کہ ادارہ معاملے سے آگاہ ہے، تاہم جاری تحقیقات پر فی الحال کوئی تبصرہ نہیں کیا جا سکتا رپورٹس کے مطابق کینیڈا کرکٹ طویل عرصے سے انتظامی مسائل اور تنازعات کا شکار رہی ہے۔