پی ٹی آئی نے چیف الیکشن کمشنر سلطان راجہ سے استعفیٰ دینے کا مطالبہ کر دیا
اردو انٹرنیشنل (مانیٹرنگ ڈیسک) تفصیلات کے مطابق تحریک انصاف کے چیئرمین بیرسٹر گوہر نے چیف الیکشن کمشنر سکندر سلطان راجہ سے فوری مستعفی ہونے کا مطالبہ کرتے ہوئے کہا ہے کہ چیف الیکشن کمشنر آزادانہ، منصفانہ اور شفاف طریقے سے انتخابات کرانے میں ناکام رہے۔
بیرسٹر گوہر خان نے اڈیالہ جیل کے باہر میڈیا سے گفتگو کرتے ہوئے کہا کہ آج عمران خان صاحب سے ملاقات کے بعد پی ٹی آئی چیف الیکشن کمشنر سے مستعفی ہونے کا مطالبہ کرتی ہے، انہیں ایک دن بھی عہدے پر رہنے کا کوئی حق نہیں ہے۔
انہوں نے مطالبہ کیا کہ انتخابی دھاندلی کی تمام انکوائریاں غیر جانبدارانہ اور کسی مداخلت کے بغیر ہونی چاہئیں۔ بیرسٹر گوہر نے مزید کہا کہ ہم چاہتے ہیں کہ انتخابی نتائج عوامی مینڈیٹ کے مطابق ہوں۔