فلسطینیوں سے یکجہتی کے عالمی دن پر کراچی میں بڑی ریلی کی تیاریاں
اردو انٹرنیشنل (مانیٹرنگ ڈیسک ) فلسطینی عوام سے یکجہتی کے عالمی دن کے موقعے پر کراچی میں آج (بروز) بدھ کو ایک بڑی ریلی کا انعقاد کیا جا رہا ہے، جس میں ملک کی بڑی سیاسی جماعتوں اور بااثر سماجی حلقوں نے شرکت کا اعلان کر رکھا ہے۔
اقوام متحدہ نے 1977 میں ہر سال 29 نومبر کو فلسطینی عوام کے ساتھ یکجہتی کے عالمی دن کے موقعے پر منانے کا اعلان کیا تھا۔اسی سلسلے میں آج کراچی میں ریلی شاہراہِ قائدین پر طارق روڈ چوک سے سہ پہر ساڑھے تین بجے نکالی جائے گی۔
پاکستان پیپلز پارٹی، جماعت اسلامی، متحدہ قومی موومنٹ پاکستان اور عوامی نیشنل پارٹی سمیت مختلف سیاسی جماعتوں، تاجر تنظیموں، طلبہ، وکلا اور مزدوروں تنظیموں نے ریلی میں شرکت کا اعلان کیا ہے۔پاکستان مسلم لیگ ن کے صدر شہباز شریف نے اپنے بیان میں پارٹی کارکنوں کو ہدایت کی ہے کہ وہ کراچی میں یوم یکجہتی فلسطین ریلی میں شرکت کریں۔
کراچی میں ٹریفک پولیس نے یکجہتی ریلی سے متعلق ٹریفک پلان جاری کرتے ہوئے کہا ہے کہ ریلی کے آغاز پر شاہراہِ قائدین سگنل سے طارق روڈ اور سندھی مسلم سوسائٹی جانے والی سڑکیں بند کر دی جائیں گے جبکہ خالد بن ولید روڈ اور پی ای سی ایچ ایس بلاک تھری جانے والی سڑکیں بھی بند ہوں گی۔
ریلی کے گزرنے کے دوران خداداد سگنل سے کشمیر روڈ جانے والی سڑک بھی بند کر دی جائے گی۔ٹریفک پولیس کا کہنا ہے کہ ریلی کے آگے بڑھتے ہی بند سڑکیں کھول دی جائیں گے۔
