Pakistan Women's Team Makes Winning Start in T20 Series, Defeats Zimbabwe by 153 Runs-PCB
پاکستان ویمن ٹیم نے زمبابوے ویمن کے خلاف تین میچوں کی ٹی ٹوئنٹی سیریز کا فاتحانہ آغاز کرتے ہوئے پہلے میچ میں 153 رنز کی بڑی کامیابی حاصل کرلی۔
نیشنل بینک اسٹیڈیم کراچی میں کھیلے گئے میچ میں پاکستان نے پہلے بیٹنگ کرتے ہوئے 5 وکٹوں کے نقصان پر 237 رنز کا پہاڑ کھڑا کیا، جس کے جواب میں زمبابوے کی ٹیم صرف 84 رنز پر ڈھیر ہوگئی۔
پاکستان کی جانب سے عائشہ ظفر نے شاندار اور جارحانہ بیٹنگ کا مظاہرہ کرتے ہوئے ناقابلِ شکست 102 رنز بنائے انہوں نے 47 گیندوں پر 15 چوکوں اور 2 چھکوں کی مدد سے اپنی سنچری مکمل کی اور اننگز کی آخری گیند پر چوکا لگا کر یہ سنگِ میل عبور کیا۔
عالیہ ریاض نے بھی برق رفتار بیٹنگ کرتے ہوئے 23 گیندوں پر 48 رنز اسکور کیے، جبکہ گل فیروزہ نے 37 رنز کی عمدہ اننگز کھیلی کپتان فاطمہ ثنا 21 رنز کے ساتھ ناٹ آؤٹ رہیں۔
ہدف کے تعاقب میں زمبابوے کی بیٹنگ لائن پاکستانی باولر کے سامنے بے بس دکھائی دی۔ نتاشا نے 24، ایڈل نے 18 اور بیزا نے 10 رنز بنائے جبکہ ٹیم کی سات بیٹرز ڈبل فگر میں بھی داخل نہ ہوسکیں۔
پاکستان کی جانب سے کپتان فاطمہ ثنا نے 3 کھلاڑیوں کو آؤٹ کیا، سعدیہ اقبال اور نتالیہ پرویز نے 2،2 وکٹیں حاصل کیں جبکہ رامین شمیم نے ایک وکٹ اپنے نام کی۔
یاد رہے کہ پاکستان ویمن ٹیم اس سے قبل ون ڈے سیریز میں بھی زمبابوے کو 0-3 سے کلین سوئپ کرچکی ہے۔
