پاکستان نے آئی بی ایس ایف سنوکر ورلڈ کپ جیت لیا

پاکستان نے اتوار کے روزآئی بی ایس ایف ٹیم سنوکر ورلڈ کپ میں شاندار کم بیک کرتے ہوئے ہانگ کانگ چین 2 کو بیسٹ آف فائیو فریم کے اعصاب شکن فائنل میں 2-3 سے شکست دے دی۔

پاکستانی جوڑی، سابق عالمی چیمپیئن محمد آصف اور اسجد اقبال نے فیصلہ کن لمحات میں مسلسل سنچری بریک لگا کر مقابلہ اپنے نام کیا۔

فائنل کا آغاز ہانگ کانگ کے چاؤ ہون مین کے 85 بریک کے ساتھ 0-94 کی فتح سے ہوا، مگر محمد آصف نے دوسرے فریم میں 82 کے بریک کے ساتھ میچ برابر کر دیا ڈبلز فریم جیت کر ہانگ کانگ نے برتری دوبارہ حاصل کی، تاہم ریورس سنگلز میں پاکستان کی واپسی فیصلہ کن ثابت ہوئی۔

محمد آصف نے 100 کا بے عیب بریک لگا کر مقابلہ 2-2 کر دیا، اور آخری فریم میں اسجد اقبال نے 104 کا شاندار سنچری بریک بنا کر پاکستان کو 0-104 کی جیت کے ساتھ ٹائٹل دلا دیا۔

فریم اسکور:

0–94 (85)، 95 (82)–17، 41–84، 100 (100)–36، 104 (104)–0۔

یہ فتح محمد آصف کے کیریئر کا ساتواں عالمی ٹائٹل ہے، جس میں تین ٹیم ورلڈ چیمپئن شپ، تین انفرادی عالمی ٹائٹلز اور ایک ورلڈ ماسٹرز کا اعزاز شامل ہے۔