پاک بھارت ٹاکرا: کولمبو جانے والوں کیلئے بری خبر، فضائی ٹکٹوں میں غیر معمولی اضافہ

ٹی ٹوئنٹی ورلڈ کپ  میں پاکستان اور بھارت کے ہائی پروفائل مقابلے سے قبل سفری اخراجات میں غیر معمولی اضافہ دیکھنے میں آ رہا ہے۔ 15 فروری کو آر پریماداسا اسٹیڈیم میں شیڈول میچ کے باعث بھارت سے کولمبو جانے والی پروازوں کے کرایے کئی گنا بڑھ گئے ہیں۔

بھارتی میڈیا رپورٹس کے مطابق بعض روٹس پر ٹکٹوں کی قیمت میں 7 ہزار سے 25 ہزار بھارتی روپے تک اضافہ ہوا ہے، جبکہ جو ٹکٹ پہلے تقریباً 7 ہزار روپے میں دستیاب تھی وہ اب 42 ہزار روپے تک فروخت کی جا رہی ہے۔

دہلی، ممبئی اور چنئی سے کولمبو جانے والی پروازوں میں بکنگ کے غیر معمولی رش کے باعث کرایوں میں تیزی سے اضافہ ہوا ہے۔

چنئی سے کولمبو کے لیے یومیہ 16 پروازیں چلتی ہیں اور عام طور پر یہ روٹ کم خرچ سمجھا جاتا ہے، تاہم میچ کی تاریخ قریب آتے ہی اکانومی کلاس کے کرایے 7 ہزار سے بڑھ کر 20 سے 25 ہزار روپے تک پہنچ گئے ہیں، جبکہ بعض ایئرلائنز کے کرایے 42 ہزار روپے سے بھی تجاوز کر چکے ہیں۔

اطلاعات کے مطابق پاکستان سے بھی سیکڑوں شائقین میچ دیکھنے کے لیے کولمبو روانہ ہو رہے ہیں، جس کے باعث خطے میں سفری طلب میں نمایاں اضافہ ریکارڈ کیا جا رہا ہے۔

ماہرین کے مطابق روایتی حریفوں کے درمیان مقابلے کی غیر معمولی دلچسپی نے فضائی کرایوں کو عروج پر پہنچا دیا ہے۔