پاکستان کے ہیڈ کوچ ، اسسٹنٹ کوچ کا پی سی بی ہیڈ کوارٹر میں اجلاس

پاکستان کے ہیڈ کوچ ، اسسٹنٹ کوچ کا پی سی بی ہیڈ کوارٹر میں اجلاس

اردو انٹرنیشنل (اسپورٹس ڈیسک) تفصیلات کے مطابق پاکستان مینز کرکٹ ٹیم کے وائٹ بال کے ہیڈ کوچ گیری کرسٹن، ریڈ بال کے ہیڈ کوچ جیسن گلیسپی اور اسسٹنٹ کوچ اظہر محمود نے بدھ کو پاکستان کرکٹ بورڈ (پی سی بی) ہیڈ کوارٹرز میں ملاقات کی۔

تینوں کوچز نے ٹیم کی موجودہ صورتحال اور ٹیم کو صحیح سمت میں لے جانے کے لیے مستقبل کے منصوبوں پر تبادلہ خیال کیا۔

واضح رہے کہ گزشتہ روز گیری کرسٹن، جیسن گلیسپی اور اظہر محمود نے پی سی بی کے چیئرمین محسن نقوی سے بھی ملاقات کی تھی، جہاں انہوں نے قومی ٹیم کے لیے جامع کوچنگ پلان بنانے پر تبادلہ خیال کیا تھا۔

کرسٹن اور گلیسپی نے اپنے اپنے فارمیٹس میں ٹیم کی کارکردگی کو بہتر بنانے کے اپنے منصوبوں کو آگے بڑھایا، جس میں بیٹنگ اور باؤلنگ کے ساتھ ساتھ کھلاڑیوں کی فیلڈنگ اور فٹنس کو بہتر بنانے پر بڑا زور دیا گیا۔

چیئرمین پی سی بی نے کوچز پر اعتماد کا اظہار کیا اور مکمل تعاون کو یقینی بناتے ہوئے انہیں اپنے فیصلے کرنے میں آزادانہ اختیار دیا۔

کوچز اور چیئرمین نے اس بات پر اتفاق کیا کہ پاکستان میں ٹیلنٹ کی کمی نہیں ہے ہ تاہم ہر کھلاڑی کی صلاحیتوں سے بہترین فائدہ اٹھانے کے لیے درست امتزاج بنانے کی ضرورت ہے۔

دریں اثنا، ایک اور پیشرفت میں، سابق کرکٹرز وہاب ریاض اور عبدالرزاق کو گزشتہ روز سات رکنی پاکستان مینز کرکٹ سلیکشن کمیٹی سے نکال دیا گیا۔