پراسرار بیماری،پاکستان میں ’زیکا وائرس‘ کی تصدیق
اردو انٹرنیشنل (مانیٹرنگ ڈیسک) جی یونیورسٹی کے محققین نےکراچی میں ‘زیکاوائرس’ کی موجودگی کاانکشاف کیا ہے۔
محققین کے مطابق 2021 اور 22 میں کراچی میں زیکا وائرس کے 2،2 کیس سامنے آئے، زیکا وائرس کی موجودگی کی تصدیق یونیورسٹی آف واشنگٹن کی لیبارٹری سے بھی ہوئی، یہ وائرس ڈینگی اور چکن گنیا پھیلانے والے مچھروں میں پایا جاتا ہے۔
محققین کا بتانا ہےکہ 2021 میں ڈینگی جیسی علامات والی بیماری سےکراچی میں سیکڑوں لوگ متاثر ہوئے اور کراچی میں اس وقت بھی ڈینگی اور چکن گنیا اوران سے ملتی جلتی وباپھیلی ہوئی ہے۔
ماہرین کے مطابق کراچی میں اس سال ڈینگی سے کم ازکم 10 افرادکا انتقال ہوچکاہے۔
پرنسپل انویسٹی گیٹر آف یو ڈبلیو اے آر این اسٹڈی ڈاکٹر نجیحہ طلعت اقبال نے دی نیوز کو بتایا کہ ان کیسز کی بعد ٰمیں یونی ورسٹی آف واشنگٹن سیٹل میں گیل لیب میں میٹاجینومکس کے ذریعے تصدیق ہوئی۔
نومبر 2021 میں دی نیوز انٹرنیشنل نے کراچی میں ڈینگی جیسے ’پراسرار وائرل فیور‘ کے کیسز سے متعلق خبر دی تھی، اس میں مریض کے پلیٹیلیٹس اور وائٹ بلڈ سیلز کم ہو رہے تھے لیکن ڈینگی ٹیسٹ منفی آرہا تھا، ان خبروں کے بعد یو ڈبلیو اے آر این نے اس سے متعلق تحقیق کا آغاز کیا اور 2021، 2022 میں زیکا وائرس کے دو سنگل اور 2 مکس انفیکشنز کی تشخیص کی اور سیرولوجی اور پی سی آر کے ذریعے ڈینگی کی تصدیق کی۔
ڈاکٹر نجیحہ اقبال نے وضاحت کی کہ یو ڈبلیو اے آر این کنسورشیم ایک ملٹی سینٹر اسٹڈی ہے جس میں پاکستان، سینیگال، جنوبی افریقہ، برازیل اور تائیوان شامل ہیں جو پروفیسر ویس وان وورہیس اور شریک پرنسپل تفتیش کاروں کے ذریعے یونیورسٹی آف واشنگٹن کے زیر انتظام چلایا جاتا ہے۔
انہوں نے کہا کہ ’اس اسٹڈی کا مقصد نئے سامنے آنے والے وائرسز کی خصوصیات کی تشخیص کرنا ہے اور یو ڈبلیو اے آر این سینڑز میں مچھر، مکھیوں کے ذریعے منتقل ہونے والے وائرسز کی مسلسل نگرانی کرنا ہے، آغا خان یونی ورسٹی ڈینگی، چکن گنیا اور دیگر خون سے متعلق وارئسز سمیت آربووائرسز کی فعال نگرانی کے لیے یو ڈبلیو اے آر این کے ساتھ کام کر رہا ہے ۔
ڈاکٹر نجیحہ اقبال نے نوٹ کیا کہ محققین نے آغا خان یونی ورسٹی کے وارڈز میں موجود، او پی ڈی میں آنے والے اور ڈاکٹرز کی جانب سے ریفر کیے گئے اکیوٹ وائرل سے متاثرہ ایک سال سے 75 سال کی عمر کے مریضوں کی فہرست بنائی، آربو وائرس کوہورٹ میں 44 مریضوں کا اندراج کیا گیا جن میں سے 6 مریض شدید بخار، الٹی اور اسہال کے ساتھ این ایس ون منفی تشخیص ہوئی، یہ کیسز اگست اور نومبر 2021 کے درمیان رپورٹ کیے گئے تھے۔
انہوں نے مزید کہا کہ ہماری تحقیق کے دوران ہم نے پاکستان میں زیکا وائرس کی موجودگی کی تصدیق کی جو اس سے پہلے دریافت نہیں ہوا تھا۔
