ایم کیو ایم نے (ن) لیگ سے اپنی مضبوط سیٹوں پر سیٹ ایڈجسٹمنٹ سے معذرت کرلی
کراچی میں ایم کیو ایم اور مسلم لیگ ن کے رہنماؤں کی ملاقات ہوئی جس میں عام انتخابات میں سیٹ ایڈجسٹمنٹ اور صوبے میں سیاسی اتحاد پر گفتگو کی گئی۔
ذرائع کا کہنا ہےکہ ایم کیوایم نے ن لیگ سے کراچی میں ان سیٹوں پر سیٹ ایڈجسٹمنٹ سے معذرت کرلی ہے جہاں ایم کیو ایم جیتنے یا بھرپور مقابلے کی پوزیشن میں ہے.ان میں سے اکثر سیٹوں پر ایم کیو ایم ماضی میں جیتتی رہی ہے.
تاہم لیاری، کیماڑی اور ملیر کے چند حلقوں پر سیٹ ایڈجسٹمنٹ کیلئے رضا مندی ظاہر کی ہے۔جبکہ حیدرآباد میں قومی اسمبلی کی دونوں نشستوں پر ایم کیوایم نے اپنا امیدوار لانے پر زور دیا ہے جب کہ میرپورخاص، نوابشاہ، سکھر، لاڑکانہ اور ٹنڈوالہ یار کی نشستوں پر ایم کیو ایم بات کرنے پر راضی ہے۔
مسلم لیگ ن کا مؤقف ہے کہ جن نشستوں پرایم کیو ایم کو 20 سے 25 ہزار ووٹ ملے وہاں وہ متحدہ ، مسلم لیگ ن کو سپورٹ کرے۔ذرائع کے مطابق ان تجاویز کو دونوں پارٹیوں کی قیادت کے سامنے رکھا جائے گا۔