صحافی غریدہ فاروقی کی مبینہ آن لائن ہراسانی،نگران حکومت نے نوٹس لے لیا
اردو انٹرنیشنل (مانیٹرنگ ڈیسک) نگران حکومت نے نجی چینل سے وابستہ خاتون صحافی غریدہ فاروقی کی مبینہ آن لائن ہراسانی کا نوٹس لے لیا ۔ نگران وفاقی وزیر اطلاعات مرتضیٰ سولنگی نے سماجی رابطے کی ویب سائٹ ایکس پر کہا کہ نگران حکومت نے ایک سیاسی جماعت کی ٹرول بریگیڈ کی جانب سے صحافی غریدہ فاروقی کو ہراساں کرنے کی بدنیتی پر مبنی مہم پر سخت تشویش کا اظہار کیا ہے۔
انہوں نے کہا کہ لوگوں کے گھروں کے پتہ جات اور پرائیویٹ فون نمبرز لیک کرنا تشدد اور ہراساں کرنے کے مترادف ہے۔انہوں نے کہا کہ اس ہراسانی کو قطعی برداشت نہیں کیا جائے گا۔ متعلقہ حکام اس معاملے کی تحقیقات کر رہے ہیں۔ مجرمان اور ان کے ہینڈلرز قانون کے مطابق سزا سے نہیں بچ سکیں گے۔
واضح رہے کہ اس سے قبل نیشنل پریس کلب کے صدر انور رضا ، سیکرٹری خلیل احمد راجہ اور فنانس سیکرٹری نیئر علی سمیت مجلس عاملہ کے اراکین نے سینئر صحافی اینکر پرسن غریدہ فاروقی کے خلاف سوشل میڈیا پر جھوٹ پر مبنی گمراہ کن پروپیگنڈے کی شدید الفاظ میں مذمت کی ہے.
