ایشین ہاکی چیمپئنز ٹرافی میں بھارت نے پاکستان کو شکست دے دی

+ایشین ہاکی چیمپئنز ٹرافی میں بھارت نے پاکستان کو شکست دے دی

اردوانٹرنیشنل(اسپورٹس ڈیسک) تفصیلات کے مطابق چین کے اندرونی منگولیا کے شہر ہولن بئیر میں موکی ہاکی ٹریننگ بیس پر ایشین ہاکی چیمپئنز ٹرافی کے فائنل راؤنڈ کے میچ میں بھارت نے پاکستان کو 2-1 سے شکست دی۔

ایشین ہاکی چیمپئنز ٹرافی کا میچ شروع ہوتے ہی چھٹے منٹ میں احمد ندیم نے گول کرکے پاکستان کو برتری دلا دی لیکن یہ برتری زیادہ دیر برقرار نہ رہی اور 12ویں منٹ میں بھارت کو پنالٹی کارنر ملا جس پر کپتان ہرمیت پریت سنگھ نے گول کرکے مقابلہ برابر کردیا۔

دوسرا کواٹر شروع ہوا تو بھارت نے پھر پنالٹی کارنر لیا اور دوسرا گول کرکے پاکستان کے خلاف برتری حاصل کرلی ہاف ٹائم پر بھارت کو دو ایک کی سبقت حاصل تھی۔

تیسرے کوارٹر میں پاکستان نے شاندار کھیل پیش کیا زیادہ تر کھیل بھارتی ہاف میں ہوا پاکستان نے اس کواٹر میں پانچ پنالٹی کارنر لئے لیکن کسی ایک کو بھی گول میں تبدیل نہ کرسکی۔

پاکستان ٹیم کو دو مرتبہ دس دس کھلاڑیوں سے کھیلنا پڑا ایک بار سفیان نے فاول کیا تو انہیں پانچ منٹ باہر بیٹھنا پڑا ور آخری کواٹر میں رانا وحید نے فاول کیا جس پر انہیں دس منٹ کیلئے باہر کردیا گیا۔

آخری کواٹر میں بھی دونوں ٹیموں نے گول کرنے کی بھرپور کوشش کی لیکن کوئی ٹیم گول نہ کرسکی اور یوں بھارت نے پاکستان کو ایک کے مقابلے میں دو گول سے شکست دے دی۔

میچ کے دوران پاکستان کے ابوبکر محمود گھٹنے کی انجری کے باعث گراؤنڈ سے باہر چلے گئے تھے۔

واضح رہے کہ پاکستان اور بھارت دونوں ہی سیمی فائنل کے لیے کوالیفائی کر چکے ہیں۔

پاکستان نے جمعرات کو چین کے خلاف 5-1 سے جیت درج کی جبکہ انہوں نے اپنے تیسرے میچ میں جاپان کو شکست دی۔