پاکستان کے سابق کپتان اظہر علی اسکاٹ لینڈ کرکٹ ٹیم کے کنسلٹنٹ مقرر

اظہر علی کو کرکٹ اسکاٹ لینڈ نے بطور کنسلٹنٹ مقرر کردیا 41 سالہ سابق پاکستانی کپتان نیپال میں ہونے والی آئی سی سی سی ڈبلیو سی لیگ ٹو سیریز کے دوران اسکاٹ لینڈ ٹیم کے ساتھ ذمہ داریاں نبھائیں گے، جہاں ٹیم کو نیپال اور امریکا کے خلاف میچز کھیلنے ہیں۔

کرکٹ اسکاٹ لینڈ کی جانب سے جاری اعلامیے کے مطابق اظہر علی ٹیم کی تیاریوں اور کھلاڑیوں کی رہنمائی میں کردار ادا کریں گے اس موقع پر اظہر علی نے کہا کہ وہ اسکاٹ لینڈ کرکٹ ٹیم کے ساتھ کام کرنے کے لیے پُرجوش ہیں اور اپنے تجربے سے باصلاحیت کھلاڑیوں کی ترقی میں مدد دینا چاہتے ہیں۔

سابق قومی کپتان نے مزید کہا کہ ان کے کیریئر کے ابتدائی دنوں میں بھی اسکاٹ لینڈ کے ساتھ تعلقات رہے ہیں، یہی وجہ ہے کہ وہ اس نئی ذمہ داری کو خاص اہمیت دے رہے ہیں۔