کینیڈا رفح میں اسرائیلی فوجی آپریشن کی حمایت نہیں کرتا فوری جنگ بندی کا مطالبہ کرتے ہیں:کینیڈین وزیرِ خارجہ
اردو انٹرنیشنل (مانیٹرنگ ڈیسک) کینیڈین وزیرِ خارجہ میلانی جولی نے رفح میں جاری اسرائیلی وحشیانہ حملوں کی مذمت کرتے ہوئے کہا کہ معصوم فلسطینیوں کا قتل کسی صورت بھی قابلِ قبول نہیں۔
میلانی جولی نے27 مئی کو پارلیمنٹ میں اپنے خطاب کے دوران غزہ میں فوری جنگ بندی کا مطالبہ کیا۔
اُنہوں نے کہا کہ جنگ کے وقت بھی انسانیت کے کچھ اصولوں کی پابندی کی جاتی ہے لیکن رفح میں جو مناظر ہمیں دیکھنے کو ملے وہ دل دہلا دینے والے ہیں۔
کینیڈین وزیرِ خارجہ نے کہا کہ رفح آپریشن پر ہمارا مؤقف بہت واضح ہے جو ہم پچھلے کئی ہفتوں سے بتا بھی رہے ہیں۔
اُنہوں نے مزید کہا کہ فلسطینیوں کے پاس اب کوئی محفوظ جگہ باقی نہیں ہے۔
میلانی جولی نے کہا کہ معصوم فلسطینیوں کا قتل کسی صورت بھی قابلِ قبول نہیں اور اس حوالے سے عالمی عدالت نے جو فیصلے کیے ہیں ہم ان کے پابند ہیں۔
اُنہوں نے کہا کہ اس وقت فلسطین کی حالت تباہ کن ہے اور اسی لیے ہم فوری طور پر جنگ بندی چاہتے ہیں۔
سوشل میڈیا پلیٹ فارم ایکس پر اپنی پوسٹ میں کینیڈین وزیر خارجہ میلانی جولی نے کہا کہ ہم رفح میں فلسطینی شہریوں کی ہلاکتوں سے خوفزدہ ہیں۔
انہوں نے مزید کہا کہ کینیڈا رفح میں اسرائیلی فوجی آپریشن کی حمایت نہیں کرتا اور انسانی مصائب کی اس سطح کو ختم ہونا چاہیے۔
انہوں نے کہا کہ ہم فوری جنگ بندی کا مطالبہ کرتے ہیں۔
واضح رہے کہ اسرائیل فوج کی جانب سے دو روز قبل غزہ کے محفوظ ترین علاقے رفح پر وحشیانہ بمباری کے نتیجے میں 45 معصوم شہریوں کی شہادت ہوئی تھی، غزہ کی وزارت صحت کے مطابق 7 اکتوبر 2023 کے بعد سے اسرائیلی حملوں میں اب تک 36 ہزار سے زائد فلسطینی شہید ہو چکے ہیں۔
