بلیسنگ موزاربانی کو معاہدے کی خلاف ورزی پر پی ایس ایل کے آئندہ دو ایڈیشن سے باہر کر دیا

پاکستان کرکٹ بورڈ (پی سی بی) نے زمبابوے کے فاسٹ بولربلیسنگ موزاربانی کو معاہدے کی خلاف ورزی پر پاکستان سپر لیگ (پی ایس ایل) کے آئندہ دو ایڈیشنز سے باہر کر دیا ہے۔

پی سی بی کی جانب سے جاری اعلامیے کے مطابق کھلاڑی کے خلاف تفصیلی تادیبی کارروائی کے بعد یہ فیصلہ کیا گیا بورڈ کا کہنا ہے کہ موزاربانی نے طے شدہ شرائط کے باوجود پیشہ ورانہ ذمہ داریوں کو نظر انداز کیا اور متضاد مصروفیات کو ترجیح دی، جو لیگ کے ڈسپلن اور ساکھ کے منافی ہے۔

اعلامیے میں مزید کہا گیا کہ لیگ کے پیشہ ورانہ ماحول کو برقرار رکھنے کے لیے یہ پابندی ناگزیر تھی، اور مستقبل میں تمام کھلاڑیوں سے معاہدوں کی مکمل پاسداری کو یقینی بنایا جائے گا۔

واضح رہے کہ موزاربانی نے پی ایس ایل سے معاہدہ کرنے کے باوجود بھارتی لیگ میں شرکت کو ترجیح دی، جس کے باعث یہ سخت فیصلہ سامنے آیا۔