سیاحوں کے لئےبڑی خبر بابوسر روڈ 7 ماہ کی بندش کے بعد دوبارہ کھول دیا گیا
اردو انٹرنیشنل (مانیٹرنگ ڈیسک) مشہور سیاحتی مقام بابوسر روڈ کو 7 ماہ تک بند رہنے کے بعد ہلکی ٹریفک کے لیے کھول دیا گیا۔
رپورٹ کے مطابق علاقے میں شدید برف باری کے باعث سڑکیں بند ہوگئی تھیں۔
دیامر کے ڈپٹی کمشنر فیاض احمد نے بتایا کہ بابوسر ٹاپ اور قریبی علاقوں سے برف ہٹانے کے بعد بابوسر روڈ کو پیر کو ہلکی ٹریفک کے لیے کھول دیا گیا ہے۔
انہوں نے کہا کہ خیبر پختونخوا اور گلگت بلتستان کی جانب سے بابوسر روڈ پر گاڑیوں کی آمدورفت عیدالاضحیٰ تک روزانہ صبح 5 بجے سے شام 5 بجے تک کی اجازت دی گئی ہے۔
ڈپٹی کمشنر نے کہا کہ دن کے وقت برف کے بھاری پگھلنے اور رات کے وقت جمنے کے خطرات کے پیش نظر صرف دن کے وقت ٹریفک کی نقل و حرکت کی اجازت دی گئی ہے۔
ان کا مزید کہنا تھا کہ سڑک پر سفر کے نئے اوقات کا اعلان عیدالاضحیٰ کے بعد کیا جائے گا۔
مسافروں کو ہدایت کی گئی ہے کہ وہ محکمہ موسمیات کی ٹریول ایڈوائزری پر سختی سے عمل کریں۔
ایڈوائزری کے مطابق مسافروں اور سیاحوں سے درخواست کی گئی ہے کہ وہ محکمہ موسمیات کی ایڈوائزری/الرٹس کو چیک کرنے کے بعد بابوسر روڈ کے لیے اپنے سفر کا منصوبہ بنائیں۔
دیامر سے مانسہرہ تک کا سفر بابوسر روڈ کے ذریعے 7 گھنٹے میں طے ہوتا ہے جبکہ یہی فاصلہ شاہراہ قراقرم کے ذریعے 14 گھنٹے میں طے ہوتا ہے۔
