اردو انٹرنیشنل (مانیٹرنگ ڈیسک) عرب نیوز نے اپنی خبر میں رپورٹ کیا ہےکہ وزیر خارجہ اسحاق ڈار نے کہا ہے کہ اقتصادی تعاون تنظیم کے تحت علاقائی تجارت، معاشی روابط اور بامعنی تعاون کی پیش رفت کا انحصار اس بات پر ہے کہ افغان حکام اپنے ہمسایہ ممالک کے سکیورٹی خدشات دور کریں، خصوصاً دہشت گردی کے خطرے سے نمٹنے کے لیے اقدامات کیے جائیں۔
اسحاق ڈار نے پیر کو اسلام آباد میں ای سی او کونسل آف منسٹرز کے 30ویں اجلاس سے خطاب کرتے ہوئے کہا کہ رکن ممالک کو ان وسیع تر حالات کو مدنظر رکھنا ہوگا جن پر ان کے معاشی ایجنڈے کی کامیابی منحصر ہے۔
ان کے مطابق معاشی تعاون ممالک کے درمیان مشترکہ مفادات اور استحکام کو فروغ دیتا ہے، جبکہ بدامنی ترقی کے امید افزا منصوبوں کو بھی متاثر کر سکتی ہے۔
اجلاس میں ای سی او کے رکن ممالک کے وزرائے خارجہ، وفود کے سربراہان، تنظیم کے سیکریٹریٹ اور ذیلی اداروں کے نمائندوں نے شرکت کی۔
تنظیم میں پاکستان، افغانستان، ایران، ترکیہ، آذربائیجان، قازقستان، کرغزستان، تاجکستان، ترکمانستان اور ازبکستان شامل ہیں۔ ای سی او 1964 میں قائم ہونے والی بین الحکومتی تنظیم ہے، جس کا مقصد خطے میں پائیدار معاشی ترقی کو فروغ دینا ہے۔
پاکستانی وزیر خارجہ نے کہا کہ پاکستان ایک پُرامن، خوشحال اور مستحکم افغانستان کا خواہاں ہے، جو ای سی او کے علاقائی نظام میں مکمل طور پر شامل ہو اور اپنے تمام ہمسایہ ممالک کے ساتھ امن سے رہے۔
ان کے بقول ایسا افغانستان نہ صرف افغان عوام بلکہ پورے خطے کے مفاد میں ہوگا اور تجارت، ٹرانزٹ اور معاشی تعاون کے نئے راستے کھولے گا۔
تاہم اسحاق ڈار نے واضح کیا کہ اس مقصد کے لیے افغان حکام کو پڑوسی ممالک کے جائز سکیورٹی تحفظات، بالخصوص دہشت گردی کے خطرے، پر توجہ دینا ہوگی۔ انہوں نے کہا کہ پائیدار علاقائی معاشی شراکت داری کے لیے محفوظ اور مستحکم ماحول بنیادی اہمیت رکھتا ہے۔
15 اور 16 نومبر کو اسلام آباد میں ہونے والا دو روزہ اجلاس ایسے وقت میں منعقد ہوا ہے جب پاکستان خود کو وسطی ایشیا کی خشکی میں گھرے ریاستوں اور عالمی منڈیوں کے درمیان اہم تجارتی و ٹرانزٹ مرکز کے طور پر مستحکم کرنے کی کوشش کر رہا ہے۔
اسحاق ڈار نے کہا کہ جنوبی، وسطی اور مغربی ایشیا کے سنگم پر واقع خطے میں بڑی منڈیاں، قدرتی وسائل اور تاریخی تجارتی راستے موجود ہیں۔
توانائی کے ذخائر، زرعی صلاحیت اور جغرافیائی محل وقوع قریبی معاشی تعاون کے وسیع امکانات فراہم کرتے ہیں، تاہم ان سے فائدہ اٹھانے کے لیے مؤثر ٹرانسپورٹ راہداریاں، سرحدی کارروائیوں میں آسانی اور کاروبار کے لیے قابلِ اعتماد انتظامات ضروری ہیں۔
انہوں نے کہا کہ علاقائی تعاون سے نئی منڈیوں تک رسائی، تجارتی اخراجات میں کمی، سرمایہ کاری اور روزگار کے مواقع بڑھائے جا سکتے ہیں۔
پاکستان وسیع تر مارکیٹ رسائی، مضبوط علاقائی ویلیو چینز اور نجی شعبے، خصوصاً چھوٹے اور درمیانے درجے کے کاروباروں کی زیادہ شمولیت کی حمایت کرے گا۔
