اردو انٹرنیشنل (مانیٹرنگ ڈیسک) ڈان نیوز کی خبر کے مطابق پاکستان تحریک انصاف کے 4 اکتوبر کے اسلام آباد مارچ اور خیبر پختونخوا میں بڑھتی سکیورٹی کشیدگی کے تناظر میں وزیراعظم شہباز شریف نے اتحادی جماعتوں اور اپوزیشن سے مشاورت کا سلسلہ تیز کرنے کا فیصلہ کیا ہے۔
ذرائع کے مطابق وزیراعظم صدر آصف علی زرداری اور پیپلز پارٹی کے چیئرمین بلاول بھٹو زرداری سے ملاقات کرسکتے ہیں، جبکہ خیبر پختونخوا میں ممکنہ گورنر راج یا ایمرجنسی کے معاملے پر بھی اتحادیوں کو اعتماد میں لینے کی کوشش کی جارہی ہے۔
وزیراعظم کے سیاسی امور کے مشیر رانا ثناء اللہ نے ٹی وی گفتگو میں بتایا کہ امریکا سے واپسی کے بعد شہباز شریف کو ملکی سیاسی صورتحال پر بریفنگ دی گئی۔ ان کے مطابق وزیراعظم کو یہ بھی بتایا گیا کہ حکومت آئین کے تحت ایمرجنسی نافذ کرنے کا حق محفوظ رکھتی ہے۔
گزشتہ ایک ہفتے کے دوران وفاق کی جانب سے خیبر پختونخوا حکومت کو خبردار کیا گیا کہ سکیورٹی صورتحال اور 4 اکتوبر کے احتجاج کے باعث گورنر راج پر غور کیا جاسکتا ہے۔ پی ٹی آئی نے ایسی کسی کارروائی کی صورت میں سنگین نتائج کی وارننگ دی ہے۔
وزیراعظم کی قومی اسمبلی میں اپوزیشن لیڈر محمود خان اچکزئی سے ملاقات بھی متوقع ہے۔ شہباز شریف نے امریکا روانگی سے قبل انہیں قومی اہمیت اور پی ٹی آئی سے متعلق معاملات پر مشاورت کی دعوت دی تھی۔
وزیراعظم جماعت اسلامی کے امیر حافظ نعیم الرحمٰن سے بھی ملاقات کریں گے، جس میں پٹرولیم لیوی سمیت دیگر معاملات زیر بحث آنے کا امکان ہے۔
دوسری جانب مسلم لیگ ن اور پیپلز پارٹی کے درمیان اہم مشاورت ہوئی۔ پیپلز پارٹی کی شیری رحمان اور سید نوید قمر نے قانون وزیر اعظم نذیر تارڑ اور وزیر پارلیمانی امور طارق فضل چوہدری سے خیبر پختونخوا کی صورتحال پر بات کی۔
ملاقات کے بعد طارق فضل چوہدری نے کہا کہ آئین کے آرٹیکل 232 کے تحت خیبر پختونخوا میں بڑھتی دہشت گردی کے باعث ایمرجنسی زیر غور ہے۔ ان کے مطابق یہ اقدام سیاسی بنیادوں پر نہیں بلکہ سکیورٹی صورتحال کے باعث ہوگا۔
حکومت اور پیپلز پارٹی کے درمیان قومی اسمبلی میں پیش کیے جانے والے چار بلز پر بھی گفتگو ہوئی۔ ان میں پورٹ قاسم اتھارٹی، گوادر پورٹ اتھارٹی، کراچی پورٹ اتھارٹی اور لائف انشورنس نیشنلائزیشن سے متعلق ترامیمی بل شامل ہیں۔ ذرائع کے مطابق پیپلز پارٹی نے تین بلز سے اتفاق جبکہ ایک مسترد کیا۔
پیپلز پارٹی کے رہنما نیر بخاری نے کہا کہ گورنر راج کے معاملے پر رائے مانگی گئی تو پارٹی آئین اور قانون کے دائرے میں سفارشات دے گی۔ انہوں نے خیبر پختونخوا کی سکیورٹی صورتحال کو انتہائی تشویشناک قرار دیا۔
نیر بخاری نے سیاسی مسائل کے حل کے لیے مذاکرات پر زور دیتے ہوئے کہا کہ قومی معاملات طاقت اور محاذ آرائی کے بجائے سیاسی مکالمے سے حل ہونے چاہئیں۔
ادھر پی ٹی آئی 4 اکتوبر کے مارچ کو مؤخر کرنے کے امکان کو مسترد کرچکی ہے، جس کے باعث وفاق اور صوبائی حکومت کے درمیان سیاسی کشیدگی برقرار ہے۔
