کے پی میں انٹیلی جنس آپریشنز تیز، مطلوب دہشتگرد جان میر عرف طور ثاقب مارا گیا

اردو انٹرنیشنل (مانیٹرنگ ڈیسک) ایکسپریس ٹریبیون کی رپورٹ کے مطابق سیکیورٹی فورسز نے خیبرپختونخوا کے مختلف علاقوں میں گزشتہ 48 گھنٹوں کے دوران انٹیلی جنس بیسڈ آپریشنز کرتے ہوئے بھارتی سرپرستی میں سرگرم فتنہ الخوارج سے تعلق رکھنے والے 23 دہشتگرد ہلاک کر دیے۔

پاک فوج کے شعبہ تعلقات عامہ کے مطابق کارروائیاں دتہ خیل، سپین وام اور بنوں سمیت مختلف حساس علاقوں میں خفیہ اطلاعات کی بنیاد پر کی گئیں، جہاں دہشتگردوں کے متعدد ٹھکانوں کو نشانہ بنایا گیا۔

آئی ایس پی آر کے مطابق شدید فائرنگ کے تبادلے میں مارے جانے والوں میں مطلوب دہشتگرد رنگ لیڈر جان میر عرف طور ثاقب بھی شامل ہے، جو سیکیورٹی اہلکاروں اور شہریوں پر حملوں سمیت کئی دہشتگرد کارروائیوں میں مطلوب تھا۔ حکومت نے اس کے سر کی قیمت بھی مقرر کر رکھی تھی۔

بیان میں کہا گیا کہ کارروائیوں کے دوران بھاری مقدار میں اسلحہ، گولہ بارود، دھماکا خیز مواد اور دیسی ساختہ بم برآمد کیے گئے، جبکہ دہشتگردوں کے زیر استعمال زیرِ زمین سرنگوں اور بنکروں کا نیٹ ورک بھی تباہ کر دیا گیا۔

آئی ایس پی آر کے مطابق علاقوں میں کلیئرنس اور سرچ آپریشنز جاری ہیں تاکہ چھپے ہوئے دہشتگردوں کا مکمل خاتمہ کیا جا سکے۔ فوج کے مطابق نیشنل ایکشن پلان کے تحت شروع کیے گئے آپریشن عزمِ استحکام کے ذریعے دہشتگردی کے خاتمے کیلئے کارروائیاں پوری شدت سے جاری رہیں گی۔

وفاقی ایپکس کمیٹی نے جون 2024 میں ملک بھر سے دہشتگردی اور انتہا پسندی کے خاتمے کیلئے آپریشن عزمِ استحکام کی منظوری دی تھی۔

دوسری جانب ضلع باجوڑ کے علاقے شاخی تھنگی میں کواڈ کاپٹر ڈرون حملے کے نتیجے میں دو اسکولی بچے جاں بحق ہوگئے۔ مقامی ذرائع کے مطابق دونوں بچے اسکول سے گھر واپس جا رہے تھے کہ اچانک حملے کی زد میں آ گئے۔

زخمی بچوں کو فوری طور پر ڈسٹرکٹ ہیڈکوارٹر ہسپتال خار منتقل کیا گیا، تاہم وہ جانبر نہ ہو سکے۔ جاں بحق بچوں کی عمریں 10 اور 12 سال بتائی گئی ہیں۔