پاکستان ٹیم کا کراچی میں کیمپ، بنگلا دیش سیریز سے پہلے بڑا امتحان شروع

پاکستان کرکٹ ٹیم نے بنگلا دیش کے خلاف آئندہ ٹیسٹ سیریز کی تیاریوں کا آغاز کرنے کا فیصلہ کر لیا ہے، جس کے تحت قومی اسکواڈ کا تربیتی کیمپ کراچی میں لگایا جائے گا۔

ذرائع کے مطابق ٹیسٹ اسکواڈ کے کھلاڑی 29 اپریل سے کیمپ میں رپورٹ کریں گے، جبکہ ٹیم 3 مئی کی رات بنگلا دیش روانہ ہوگی۔سیریز میں شامل دونوں ٹیسٹ میچز 8 مئی کو سلہٹ اور 16 مئی کو ڈھاکا میں کھیلے جائیں گے۔

اسکواڈ کے حتمی انتخاب کے لیے قومی سلیکٹرز کی مشاورت جاری ہے، جس میں سابق کپتان سرفراز احمد بھی شریک ہیں اطلاعات کے مطابق سرفراز احمد اسی سیریز سے ہیڈ کوچ کی ذمہ داریاں سنبھال سکتے ہیں۔

ذرائع کا کہنا ہے کہ ٹیم مینجمنٹ اور اسکواڈ میں رد و بدل کا امکان ہے، جبکہ وکٹ کیپر روحیل نزیر کو بھی سیریز کے لیے موقع دیے جانے کی توقع ہے۔

واضح رہے کہ پاکستان نے اپنی آخری ٹیسٹ سیریز گزشتہ سال اکتوبر میں جنوبی افریقہ کے خلاف کھیلی تھی۔