لاہور قلندرز کا کینسر میں مبتلا کمسن مداح کی خواہش پوری کرنے کا اعلان

لاہور قلندرز نے انسانیت دوستی کی شاندار مثال قائم کرتے ہوئے کینسر میں مبتلا ایک کمسن مداح کی خواہش پوری کرنے کا اعلان کر دیا ہے۔

گوجرانوالہ کے علاقے قلعہ دیدار سنگھ سے تعلق رکھنے والے چار سالہ فرزان کی ویڈیو سوشل میڈیا پر وائرل ہوئی تھی، جس میں اس نے اپنی بیماری کے باوجود حوصلہ اور ہمت کا مظاہرہ کرتے ہوئے اپنی ایک خواہش کا اظہار کیا تھا فرزان گزشتہ چار سال سے کینسر کے خلاف بہادری سے لڑ رہا ہے۔

ویڈیو پیغام میں فرزان نے بتایا کہ وہ لاہور قلندرز کا بڑا مداح ہے اور اس کی دلی خواہش ہے کہ وہ قومی ٹیم کے فاسٹ باؤلر شاہین شاہ آفریدی سے ملاقات کرے۔

فرزان کی معصوم اپیل سوشل میڈیا پر تیزی سے مقبول ہوئی، جس کے بعد لاہور قلندرز کی انتظامیہ نے فوری ردعمل دیتے ہوئے بچے کی خواہش پوری کرنے کا وعدہ کیا۔

ٹیم انتظامیہ کے مطابق فرزان کو لاہور میں ہونے والے آئندہ میچز میں خصوصی طور پر مدعو کیا جائے گا، جہاں اسے اپنے پسندیدہ کھلاڑی شاہین شاہ آفریدی سے ملاقات کا موقع فراہم کیا جائے گا اس کے علاوہ بچے کو کھلاڑیوں کی دستخط شدہ شرٹ بھی بطور تحفہ پیش کی جائے گی۔