T20 World Cup: West Indies win by 107 runs, alarm bells ringing for India-AFP
ٹی ٹوئنٹی ورلڈ کپ کے سپر ایٹ مرحلے میں ویسٹ انڈیز نے شاندار کارکردگی کا مظاہرہ کرتے ہوئے زمبابوے کو 107 رنز کے بھاری مارجن سے شکست دے کر گروپ 1 میں پہلی پوزیشن حاصل کرلی، جس کے بعد بھارت کے لیے سیمی فائنل کی دوڑ مزید مشکل ہوگئی ہے۔
وانکھیڑے اسٹیڈیم میں کھیلے گئے میچ میں ویسٹ انڈیز نے جارحانہ بیٹنگ کا مظاہرہ کرتے ہوئے مقررہ 20 اوورز میں 6 وکٹوں کے نقصان پر 254 رنز اسکور کیے، جو ٹی ٹوئنٹی ورلڈکپ کی تاریخ کا دوسرا بڑا مجموعہ ہے۔جواب میں زمبابوے کی ٹیم ہدف کے تعاقب میں 147 رنز پر آؤٹ ہوگئی۔
اس بڑی فتح کے بعد ویسٹ انڈیز کا نیٹ رن ریٹ 5.350 ہوگیا ہے اور وہ 2 پوائنٹس کے ساتھ گروپ میں سرفہرست ہے دوسری جانب جنوبی افریقا نے بھارت کو 76 رنز سے شکست دے کر 3.800 کے نیٹ رن ریٹ کے ساتھ دوسری پوزیشن سنبھال رکھی ہے۔
پوائنٹس ٹیبل پر بھارت بغیر کسی پوائنٹ کے منفی 3.800 نیٹ رن ریٹ کے ساتھ تیسرے نمبر پر موجود ہے، جبکہ زمبابوے چوتھے نمبر پر ہے۔
بھارت کو سپر ایٹ مرحلے میں اب ویسٹ انڈیز اور زمبابوے کے خلاف میچز کھیلنا ہیں، جہاں سیمی فائنل تک رسائی کے لیے اسے نہ صرف دونوں مقابلوں میں کامیابی درکار ہوگی بلکہ بہتر نیٹ رن ریٹ کے لیے بھاری مارجن سے فتح بھی یقینی بنانا ہوگی۔
