اپنا کھیت، اپنا روزگار ، مریم نواز کا اپریل سے مفت سرکاری زمین دینے کا اعلان

اردو انٹرنیشنل (مانیٹرنگ ڈیسک ڈان نیوز  کی خبر کے مطابق پنجاب کی وزیر اعلیٰ مریم نواز شریف نے صوبے کے زرعی شعبے کو مضبوط بنیادوں پر استوار کرنے کے لیے ایک اہم اور وسیع اقدام کا اعلان کرتے ہوئے کہا ہے کہ اپریل سے اپنا کھیت، اپنا روزگار منصوبے کے تحت قابلِ کاشت سرکاری زمین کسانوں کو بلا معاوضہ فراہم کی جائے گی۔ ان کے مطابق صوبے بھر میں موجود قابلِ کاشت حکومتی اراضی کو 10 سالہ لیز پر دیا جائے گا اور ہر مستحق فرد کو زیادہ سے زیادہ پانچ ایکڑ تک زمین مفت الاٹ کی جائے گی، جس پر کسی قسم کا کرایہ وصول نہیں کیا جائے گا۔

وزیر اعلیٰ نے اپنے بیان میں کہا کہ زمین کی فراہمی کے ساتھ کسانوں کو مالی معاونت بھی دی جائے گی تاکہ وہ فوری طور پر کاشتکاری شروع کر سکیں۔ انہوں نے واضح کیا کہ اس منصوبے کا مقصد زرعی پیداوار میں اضافہ، بے روزگاری میں کمی اور دیہی معیشت کو مستحکم بنانا ہے۔

یہ اسکیم پہلی مرتبہ 4 فروری کو راجن پور میں برقی بس سروس کے افتتاح کے موقع پر پیش کی گئی تھی، جہاں وزیر اعلیٰ نے اعلان کیا تھا کہ تقریباً ڈھائی لاکھ ایکڑ اراضی مستحق اور کم وسائل رکھنے والے افراد میں تقسیم کی جائے گی۔ سرکاری ذرائع کے مطابق منصوبے کے تفصیلی قواعد و ضوابط اور درخواست جمع کرانے کا طریقہ کار جلد جاری کیا جائے گا تاکہ شفاف انداز میں الاٹمنٹ کا عمل مکمل ہو سکے۔

وزیر اعلیٰ نے گرین ٹریکٹر پروگرام کے تیسرے مرحلے کی افتتاحی تقریب میں قرعہ اندازی کے عمل کا آغاز کرتے ہوئے کامیاب کسانوں کو مبارکباد دی۔ انہوں نے کہا کہ گزشتہ پچیس برسوں میں بیس ہزار ٹریکٹر تقسیم کیے گئے تھے جبکہ ان کی حکومت نے محض دو سال میں اکتیس ہزار ٹریکٹر فراہم کر کے نیا ریکارڈ قائم کیا ہے۔

تقریب کے دوران انہوں نے بہاولپور سے تعلق رکھنے والے ایک کامیاب کسان کو بذاتِ خود ٹیلی فون کر کے کامیابی کی اطلاع دی اور کہا کہ جدید زرعی مشینری کی فراہمی سے فی ایکڑ پیداوار میں نمایاں اضافہ ہوگا۔ وزیر اعلیٰ نے اس عزم کا اعادہ کیا کہ کسانوں کی فلاح اور زرعی ترقی حکومت کی اولین ترجیح رہے گی تاکہ پنجاب کو زرعی لحاظ سے مزید مضبوط اور خود کفیل بنایا جا سکے۔