Brazilian female footballer Kathleen Sousa converts to Islam-X
برازیل سے تعلق رکھنے والی 29 سالہ فٹبالر کیتھلین سوسا نے اسلام قبول کرلیا وہ اس وقت سعودی عرب کے معروف کلب النصر ویمن فٹبال ٹیم کی نمائندگی کر رہی ہیں۔
کلب کی جانب سے سماجی رابطے کی ویب سائٹ ایکس پر جاری بیان میں اس خبر کی تصدیق کی گئی، جبکہ کھلاڑی نے اپنے سرکاری اکاؤنٹ پر انسٹاگرام کے ذریعے بھی مداحوں کو آگاہ کیا۔
النصر ویمن فٹبال ٹیم کے پیغام میں کہا گیا کہ کیتھلین سوسا کی زندگی کے اس اہم لمحے کو شیئر کرتے ہوئے ان کے اسلام قبول کرنے کا اعلان کیا جاتا ہے اور ان کے لیے ثابت قدمی اور قلبی سکون کی دعا کی جاتی ہے۔
جاری کردہ ویڈیو میں فٹبالر کو جذباتی انداز میں دیکھا گیا، جہاں انہوں نے کہا کہ وہ درست راستے کی تلاش اور خود کو بہتر انسان بنانے کی کوشش کرتی رہی ہیں۔
کیتھلین سوسا نے مکہ مکرمہ کے دورے اور عمرہ کی ادائیگی کی تصاویر بھی شیئر کیں اور اس مثبت تبدیلی پر شکرگزاری کا اظہار کیا۔
واضح رہے کہ وہ برازیل کے شہر ساؤ ویسینتی میں پیدا ہوئیں اور برازیل ویمنز نیشنل فٹبال ٹیم کی نمائندگی بھی کر چکی ہیں۔
