محسن نقوی سے ملاقات کے بعد سری لنکا کا بڑا فیصلہ، پاکستان کے لیے ویزا ریلیف ، منفی ویزا کیٹیگری ختم

اردو انٹرنیشنل (مانیٹرنگ ڈیسک ایکسپریس ٹریبیون  کی خبر کے مطابق  سری لنکا کے صدر انورا کمارا ڈسانائیکے نے وفاقی وزیر داخلہ اور پاکستان کرکٹ بورڈ کے چیئرمین محسن نقوی سے ملاقات کے بعد پاکستان کو فوری طور پر تمام منفی ویزا فہرستوں سے نکالنے کی ہدایت کر دی۔ اس فیصلے کو پاکستانی شہریوں کے لیے سفری سہولت، کاروباری طبقے کے لیے ریلیف اور دونوں ممالک کے تعلقات میں بہتری کی اہم پیش رفت قرار دیا جا رہا ہے۔

ذرائع کے مطابق ملاقات میں محسن نقوی نے پاکستانی شہریوں کو سری لنکا کے ویزا کے حصول میں پیش آنے والی مشکلات اور تاخیر کا معاملہ اٹھایا۔ اس پر صدر ڈسانائیکے نے فوری نوٹس لیتے ہوئے متعلقہ حکام کو ہدایت کی کہ پاکستان کو تمام منفی ویزا کیٹیگریز سے نکال دیا جائے تاکہ پاکستانی مسافروں کے لیے سفری معاملات آسان ہو سکیں۔

سری لنکن صدر نے اس موقع پر یہ بھی اعلان کیا کہ سری لنکا کے وزیراعظم جلد پاکستان کا دورہ کریں گے، جسے سفارتی سطح پر دونوں ممالک کے روابط مزید مضبوط ہونے کی علامت سمجھا جا رہا ہے۔ ملاقات میں انسدادِ دہشت گردی تعاون، منشیات کے خلاف مشترکہ اقدامات اور سکیورٹی فورسز کی تربیت کے حوالے سے تعاون بڑھانے پر بھی بات چیت کی گئی۔

صدر ڈسانائیکے نے پاکستان کی جانب سے مشکل حالات میں سری لنکا کی حمایت کو سراہتے ہوئے شکریہ ادا کیا۔ انہوں نے کولمبو میں بھارت کے خلاف ٹی 20 ورلڈ کپ کا میچ کھیلنے پر پاکستان کی آمادگی کو بھی خیرسگالی کا اشارہ قرار دیا۔ صدر نے سوشل میڈیا پلیٹ فارم ایکس پر اپنے بیان میں بتایا کہ انہوں نے محسن نقوی اور وزیر برائے اوورسیز پاکستانیز چوہدری سالک حسین سے ملاقات کی، اور دونوں جانب سے دیرینہ دوستی کی توثیق کی گئی۔

دوسری طرف محسن نقوی نے سری لنکن صدر کے کردار کو پاکستان–سری لنکا تعلقات کے فروغ میں اہم قرار دیا اور وزیراعظم شہباز شریف کی جانب سے صدر ڈسانائیکے کو پاکستان کے دورے کی دعوت بھی پہنچائی۔ محسن نقوی نے ٹی 20 ورلڈ کپ کے دوران پاکستانی وفد کے لیے کیے گئے انتظامات اور مہمان نوازی پر سری لنکن قیادت کا شکریہ بھی ادا کیا۔