ٹی ٹوئنٹی ورلڈ کپ میں پاکستان کے خلاف اہم میچ سے قبل بھارتی ٹیم کے لیے اچھی خبر سامنے آئی ہے بھارتی اسپنر ورون چکرورتی نے امید ظاہر کی ہے کہ نمبر ون ٹی ٹوئنٹی بلے باز ابھیشیک شرما اتوار کو پاکستان کے خلاف میچ کے لیے دستیاب ہوں گے۔
ابھیشیک شرما کے لیے ایونٹ کا آغاز مایوس کن رہا تھا امریکا کے خلاف میچ میں وہ پہلی ہی گیند پر آؤٹ ہوگئے تھے جبکہ بعد ازاں معدے کی تکلیف کے باعث اسپتال میں داخل ہونا پڑا، جس کی وجہ سے وہ نمیبیا کے خلاف میچ میں شرکت نہ کرسکے۔
نمیبیا کے خلاف میچ کے بعد گفتگو کرتے ہوئے ورون چکرورتی نے کہا کہ انہوں نے ابھیشیک سے بات کی ہے اور وہ اب بہتر محسوس کر رہے ہیں ان کے مطابق بلے باز نے ٹیم کے ساتھ پریکٹس بھی کی ہے اور امکان ہے کہ وہ اگلے میچ میں ایکشن میں نظر آئیں گے۔
اس سے قبل بھارتی کپتان سوریا کمار یادو نے کہا تھا کہ ابھیشیک کی مکمل واپسی میں ایک یا دو میچ لگ سکتے ہیں۔
واضح رہے کہ پاکستان اور بھارت کے درمیان ہائی وولٹیج مقابلہ اتوار کو کھیلا جائے گا بھارتی ٹیم نئی دہلی سے چارٹرڈ فلائٹ کے ذریعے کولمبو پہنچ رہی ہے اور ہفتے کو پریکٹس سیشن میں حصہ لے گی۔
دوسری جانب اس بڑے مقابلے کے باعث کولمبو جانے والے مسافروں کی تعداد میں نمایاں اضافہ دیکھنے میں آیا ہے، جس سے فضائی ٹکٹوں اور ہوٹلوں کے کرایوں میں بھی غیر معمولی اضافہ ہوگیا ہے۔