سری لنکا کرکٹ کی پی سی بی سے پاک بھارت میچ کے بائیکاٹ پر نظرِثانی کی درخواست

سری لنکا کرکٹ (ایس ایل سی) نے پاکستان کرکٹ بورڈ (پی سی بی) سے بھارت کے خلاف میچ کے بائیکاٹ کے فیصلے پر نظرِثانی کی درخواست کر دی ہے۔

سری لنکن میڈیا کے مطابق ایس ایل سی نے پی سی بی کو لکھے گئے خط میں مؤقف اختیار کیا ہے کہ بائیکاٹ کے اعلان سے سری لنکا کے ٹورازم سیکٹر کو شدید نقصان پہنچا ہے، جس کے باعث شائقین کی بڑی تعداد نے ہوٹل بکنگ منسوخ کر دی ہے۔

خط میں کہا گیا ہے کہ پاک بھارت میچ کے لیے تمام انتظامات مکمل کر لیے گئے تھے، جبکہ میچ کے ٹکٹس مکمل طور پر فروخت ہو چکے ہیں اور اس میچ کی ڈیمانڈ ٹورنامنٹ میں سب سے زیادہ رہی۔

سری لنکا کرکٹ نے یاد دہانی کرائی کہ اس نے مشکل حالات میں پاکستان کرکٹ کا بھرپور ساتھ دیا اور سیکیورٹی چیلنجز کے باوجود پاکستان کے دورے کیے۔

ایس ایل سی نے مزید یقین دہانی کروائی ہے کہ تمام میچز کے لیے فول پروف سیکیورٹی انتظامات کیے گئے ہیں ذرائع کے مطابق دیگر کرکٹ بورڈز نے بھی پاکستان سے بائیکاٹ کے فیصلے پر نظرِثانی کرنے کی اپیل کی ہے۔