FIFA announces largest prize money in history for 2026 World Cup-FIFA
فٹبال کی عالمی تنظیم فیفا نے ورلڈ کپ 2026 کے لیے تاریخ کی سب سے بڑی انعامی رقم کا اعلان کر دیا ہے فیفا کے مطابق مجموعی طور پر 65 کروڑ 50 لاکھ ڈالرز کی انعامی رقم تقسیم کی جائے گی، جو 2022 ورلڈ کپ کے 44 کروڑ ڈالرز کے مقابلے میں نمایاں اضافہ ہے۔
اعلامیے کے مطابق ورلڈ کپ 2026 کی فاتح ٹیم کو 5 کروڑ ڈالرز ملیں گے جبکہ رنر اپ ٹیم کو 3 کروڑ 30 لاکھ ڈالرز دیے جائیں گے تیسرے نمبر پر آنے والی ٹیم کو 2 کروڑ 90 لاکھ اور چوتھی پوزیشن حاصل کرنے والی ٹیم کو 2 کروڑ 70 لاکھ ڈالرز ملیں گے۔
پانچویں سے آٹھویں نمبر تک کی ٹیموں کو 1 کروڑ 90 لاکھ ڈالرز جبکہ نویں سے سولہویں پوزیشن کی ٹیموں کو 1 کروڑ 50 لاکھ ڈالرز دیے جائیں گے سترہویں سے بتیسویں نمبر تک ہر ٹیم کو 1 کروڑ 10 لاکھ ڈالرز اور 33 سے 48 ویں پوزیشن کی ہر ٹیم کو 90 لاکھ ڈالرز انعام میں ملیں گے۔
اس کے علاوہ ورلڈ کپ کے لیے کوالیفائی کرنے والی ہر ٹیم کو تیاریوں کے لیے 15 لاکھ ڈالرز اضافی دیے جائیں گے۔
واضح رہے کہ فیفا ورلڈ کپ 2026 امریکا، کینیڈا اور میکسیکو میں منعقد ہوگا، جس میں پہلی بار 48 ٹیمیں حصہ لیں گی۔
