سرفرازبگٹی کی پیپلزپارٹی میں شمولیت، بلاول اب لیول پلیئنگ کی شکایت نہ کریں:احسن اقبال
اردو انٹرنیشنل (مانیٹرنگ ڈیسک) مسلم لیگ ن کے سینئر رہنما سابق وفاقی وزیراحسن اقبال نے نجی ٹی وی چینل اے آر وائے نیوز کے پروگرام میں گفتگو کرتے ہوئے کہا کہ ایم کیوایم اور ن لیگ انتخابات میں ایک دوسرے سے تعاون کریں گے کراچی کی کچھ نشستوں پر ایم کیوایم ن لیگ امیدواروں کی حمایت کرے گی۔
احسن اقبال نے کہا کہ فیصلہ ہوا ہے کہ مرکزی قیادت سے ایک رکن کراچی سے الیکشن لڑے گا کونسی مرکزی شخصیت کراچی سے الیکشن لڑےگی اس کا فیصلہ بعد میں ہوگا۔ احسن اقبال نے کہا ہے کہ سرفرازبگٹی کی پیپلزپارٹی میں شمولیت پر ہمیں اعتراض نہیں ہے نگراں حکومت کےوزیر کی پیپلزپارٹی میں شمولیت ہوئی ہے امید ہے بلاول بھٹو اب لیول پلیئنگ فیلڈکی شکایت نہیں کریں گے۔
ان کا کہنا تھا کہ نگران وزیراعظم کا فلسطین سےمتعلق بیان ہماری پالیسی کی عکاس نہیں، نگران حکومت کو اس قسم کے فیصلوں سےگریز کرنا چاہیے پاکستان سےمتعلق حساس فیصلوں کا اختیار منتخب حکومت کے پاس ہے پاکستان فلسطینیوں کے حق آزادی کی حمایت کرتا ہے۔
احسن اقبال نے کہا کہ ایم کیوایم، ق لیگ اور دیگر جماعتوں سے بات چیت جاری ہے ق لیگ سےمذاکراتی ٹیم بات کر رہی ہےجلد کسی نتیجےپر پہنچیں گے، آئی پی پی کے ساتھ سیٹ ایڈجسٹمنٹ کےلیےحتمی فیصلہ نہیں ہوا، آئی پی پی کی قیادت کے ساتھ ابھی صرف ایک ملاقات ہوئی ہے۔ قبل ازیں اپنے بیان میں مسلم لیگ ن کے رہنما احسن اقبال نے کہا ہے کہ کارکردگی کی بنیاد پر مسلم لیگ ن انتخابات میں کامیابی کیلئے پرامید ہے ۔
