چیمپئنز ٹرافی: عاقب جاوید نے خوشدل اور فہیم کو سلیکٹ کرنے کی وجہ بتادی

اردوانٹرنیشنل (اسپورٹس ڈیسک) تفصیلات کے مطابق پاکستان کے عبوری ہیڈ کوچ عاقب جاوید نے بدھ کے روز، 19 فروری سے 9 مارچ تک چلنے والی چیمپئنز ٹرافی 2025 کے لیے آل راؤنڈرز فہیم اشرف اور خوشدل شاہ کے انتخاب پر کھل کر بات کی۔

فہیم اور خوشدل ان چار کھلاڑیوں میں شامل تھے، جنہوں نے آٹھ ٹیموں کے ٹورنامنٹ کے لیے قومی ون ڈے ٹیم میں واپسی کی.

ان کے حیران کن انتخاب کے نتیجے میں سوشل میڈیا پر مداحوں کی جانب سے غم و غصے کا اظہار کیا گیا جب کہ سابق کرکٹرز نے بھی اس فیصلے پر سوالیہ نشان لگا دیا۔

دریں اثنا، عبوری ہیڈ کوچ جاوید نے نیوزی لینڈ کے خلاف آئندہ سہ ملکی ون ڈے سیریز کے افتتاحی میچ کے لیے قومی ٹیم کے تربیتی سیشن کے موقع پر میڈیا سے گفتگو کرتے ہوئے ان کے انتخاب کے پیچھے سوچ کا انکشاف کیا۔

اپنے انتخاب کا جواز پیش کرتے ہوئے، جاوید نے تنقید کے لیے کھلے پن کا اظہار کیا لیکن اس بات کا اعادہ کیا کہ انتظامیہ نے بنیادی طور پر ٹیم کمبی نیشن کی تشکیل پر توجہ دی۔

جاوید نے کہا کہ فہیم اشرف کے انتخاب پر تنقید ان کی رائے ہے اور ہم اس کا احترام کرتے ہیں تاہم، ہم اس کی صلاحیت اور ٹیم میں شراکت پر یقین رکھتے ہیں۔

عامر جمال بھی زیر بحث آئے لیکن انہوں نے زیادہ ون ڈے نہیں کھیلے لہٰذا، فہیم کو اس لیے منتخب کیا گیا کہ وہ بیٹنگ کے علاوہ تیز گیند بازی بھی کرتے ہیں، یہ ایک آپشن ہے جسے ضرورت پڑنے پر استعمال کیا جا سکتا ہے۔

انہوں نے مزید کہا کہ خوشدل شاہ کا نام دورہ آسٹریلیا سے پہلے زیر بحث تھا ہم صائم ایوب کے متبادل کے طور پر کوئی اوپننگ بلے باز نہیں رکھ سکتے تھے کیونکہ ہمیں ان کے خلا کو پر کرنے کے لیے ایک آل راؤنڈر کی ضرورت تھی، اسی لیے خوشدل کو اسکواڈ میں شامل کیا گیا۔