وزیرِ اعظم شہباز شریف کا تعلیم کے عالمی دن پر قوم کے نام خصوصی پیغام

وزیراعظم شہباز شریف نے تعلیم کے عالمی دن پر پیغام دیتے ہوئے کہا کہ آج کے دن ہمیں اس بات پر غور کرنے کی ضرورت ہے کہ تعلیم افراد اور معاشروں کونئے اور تیز رفتار ٹیکنالوجی کے دور میں آگے بڑھنے میں کیسے مدد دیتی ہے۔ شہباز شریف نے کہا کہ اس سال کے تعلیم کے عالمی دن کا موضوع “تعلیم اور مصنوعی ذہانت: خودمختاری کی حفاظت” کے تحت ہمیں یہ یاد دلاتا ہے کہ مصنوعی ذہانت کی ترقی کو انسانی وقار اور اقدار کے ساتھ ہم آہنگ ہونا چاہیے۔

وزیر اعظم شہباز شریف کا کہنا تھا کہ جس طرح مصنوعی ذہانت ہماری روزمرہ زندگیوں کا حصہ بن رہی ہے اس سے انسانی اور مشینی سرگرمیوں کے درمیان فرق کم ہوتا جا رہا ہے۔ یہ صورتحال ہمیں مواقع اور چیلنجز دونوں فراہم کررہی ہے اور اس بات پر زور دیتی ہے کہ ہم اپنی خودمختاری کی حفاظت کیسے کریں۔

انہوں نے کہا کہ ہم پاکستان میں، تعلیم کے شعبے میں ٹیکنالوجی کے بڑھتے ہوئے کردار کو تسلیم کرتے ہیں اور ہم اپنے طلبہ میں تنقیدی سوچ، جدت پسندی، اور سماجی ذمہ داری کو فروغ دینے کے لیے پرعزم ہیں تاکہ وہ مستقبل کے چیلنجز کا سامنا کر سکیں۔

انہوں نے مزید کہا کہ ؛ ہم نے اپنے تعلیمی اداروں میں ٹیکنالوجی کے بہتر استعمال کے لیے مختلف اقدامات کیے ہیں، جیسا کہ آئی سی ٹی کالجز میں جدید آئی ٹی لیبز اور دیگر منصوبے جو تعلیمی میدان میں جدت کو فروغ دینے میں اہم کردار ادا کریں گے۔ مزید برآں دیہی اسکولوں میں آئی سی ٹی ہب، گوگل سنٹر آف ایکسیلینس، اسمارٹ کلاس رومز، اور ای- تعلیم پورٹل کو بھی متعارف کروایا گیا ہے۔ اس کے ساتھ ساتھ ای- روزگار سینٹرز، سافٹ ویئر ٹیکنالوجی پارکس، روبوٹکس اور سائنس، ٹیکنالوجی، انجینئرنک، آرٹ اینڈ میتھ لیبز کے قیام سے تعلیمی میدان میں جدت کو مزید فروغ دینے میں مدد ملے گی۔

یہ وقت کی ضرورت ہے کہ ہمارے اسکول جدید ٹیکنالوجی سے آراستہ ہوں تاکہ ہمارے بچے جدید دنیا کے چیلنجز کا مقابلہ کرنے کے قابل ہوں۔ آج کے دن، ہم عہد کرتے ہیں کہ ایک ایسا تعلیمی نظام تشکیل دیں گے جو مصنوعی ذہانت کے فوائد کو اپناتے ہوئے انسانی تخلیقی صلاحیتوں اور مقصد کو برقرار رکھے۔ ہمیں اپنے اساتذہ، معاونین اور ان تمام افراد کے کردار کو بھی تسلیم کرنا چاہیے جو علم پھیلانے اور لوگوں کی زندگیوں میں روشنی لانے کے لیے محنت کر رہے ہیں۔ آئیں، اس عظیم مقصد کو جاری رکھیں اور تعلیم کو آنے والی نسلوں کے لیے امید کی کرن بنائیں۔