اردو انٹرنیشنل (اسپورٹس ویب ڈیسک) تفصیلات کے مطابق سارک سنوکر چیمپیئن شپ میں عالمی چیمپین محمد آصف نے ہم وطن محمد نسیم اختر کو سخت مقابلے کے بعد شکست دے کر فائنل میں جگہ بنالی۔
سری لنکا کے شہر کولمبو میں جاری چیمپئین شپ کے پہلے سیمی فائنل میں عالمی چیمپین محمد آصف نے سخت جدوجہد کے بعد دوسرے پاکستانی کھلاڑی اور سابق عالمی جونیئر چیمپین محمد نسیم اختر کو3-5 سے شکست دے کرفائنل کے لیے کوالیفائی کیا۔
محمد نسیم اختر بھارتی کھلاڑی کمال چاؤلہ کو 2-4 سے شکست دے کر سیمی فائنل میں پہنچے تھے۔
فائنل میں جمعے کو محمد آصف کا مقابلہ سری لنکا کے طحہ ارشاد سے ہوگا، جنہوں نے دوسرے سیمی فائنل میں نیپالی کھلاڑی انکت مان کو3-5 سے شکست دے کر فائنل کے لیے کوالیفائی کیا ہے۔
