کچھ قوتیں آج بھی نہیں چاہتیں کہ بھٹو کو انصاف ملے،بلاول بھٹو
سپریم کورٹ میں ذوالفقار علی بھٹو صدارتی ریفرنس پر سماعت کے بعد میڈیا سے گفتگو کرتے ہوئے چیئرمین پاکستان پیپلزپارٹی بلاول بھٹو زرداری نے کہا کہ 12سال بعد ریفرنس کی سماعت ہوئی ہے، 2018 میں درخواست دائرکی تھی کہ ریفرنس پر جلد سماعت کی جائے.
بلاول بھٹو کا کہنا تھا کہ ہمیں قائد عوام ذوالفقار علی بھٹو کے لیے انصاف چاہیے،انہوں نے کہا کہ امید ہےکہ ہمیں انصاف ملےگا، کچھ قوتیں آج بھی نہیں چاہتیں کہ بھٹو کوانصاف ملے، چاہتےہیں کہ عوام کے سامنےیہ بات آئےکہ ذوالفقار علی بھٹو بے قصور تھے، ریفرنس میں جو سوال اٹھائے گئے ہمیں ان کا جواب چاہیے۔
بلاول بھٹو نے کہا کہ عدالت سےاپیل ہے کہ تاریخ کو درست کرے اور اپنے ہاتھوں سے یہ خون دھوئے، ذوالفقار علی بھٹو کے قاتلوں کو بے نقاب کرے۔
چیئرمین پیپلز پارٹی نے کہا کہ مجھے اور اس قوم کو بتایا جائے کہ ذوالفقار بھٹو قاتل نہیں تھا، جس شخص کے قتل کا الزام تھا وہ آج بھی زندہ ہے، پریس کانفرنس کر رہا ہے، عوام کا اس ادارے پر اعتماد بحال کرنا ہے، اس وقت کے نظام کو عوام کے سامنے رکھنا چاہتے ہیں۔
بلاول بھٹو نے کہا کہ مسلم لیگ (ن) پیپلز پارٹی سمت ہر جماعت اور ہر شخص کا حق ہے اسے انصاف فراہم کیا جائے، ملک کے عوام اس وقت تک انصاف نہیں مل سکتا جب کہ قائد عوام کو انصاف نہ ملے، پاکستانی عدالت کو انصاف فراہم کرنے والا ادارہ تسلیم نہیں کریں گے جب تک کہ قائد عوام کو انصاف نہ ملے۔
