Panathinaikos defender Baldock found dead in swimming pool
اردو انٹرنیشنل (اسپورٹس ویب ڈیسک) تفصیلات کے مطابق پولیس ذرائع نے تصدیق کی کہ برطانوی نژاد اور پاناتھینائیکوس ٹیم کے یونانی ڈیفنڈر جارج بالڈاک کی لاش بدھ کے روز جنوبی ایتھنز کے علاقے گلیفاڈا میں ان کے گھر کے سوئمنگ پول سے ملی۔ موت کی وجہ معلوم نہیں ہو سکی۔ ایک پولیس اہلکار نے بتایا کہ 31 سالہ سابق پریمیئر لیگ کھلاڑی کی دھڑکنیں بحال کرنے کی کوشش کی گئی لیکن وہ جانبر نہ ہوسکے۔
یونانی کھلاڑی بالڈاک نے یونان کی قومی ٹیم کے لیے 12 میچز کھیلے تھے۔ وہ مئی میں انگلینڈ کی ٹیم شیفیلڈ یونائیٹڈ سے پاناتھینائیکوس میں شامل ہوئے تھے، جب ان کی ٹیم انگلش پریمیئر لیگ سے باہر ہو گئی تھی۔ انہوں نے نچلی لیگ کی ٹیموں ایم کے ڈانس اور آکسفورڈ یونائیٹڈ کے لیے بھی کھیلا تھا۔ شیفیلڈ یونائیٹڈ نے کہا کہ وہ بالڈاک کی اچانک موت پر شدید صدمے اور غم میں ہیں۔ دیگر انگلش کلبوں نے بھی ان کے انتقال پر افسوس کا اظہار کیا۔
بالڈاک نے پاناتھینائیکوس کی جانب سے چار میچز کھیلے، جن میں ہفتے کے اختتام پر مقامی حریف اولمپیاکوس کے ساتھ 0-0 کا مقابلہ بھی شامل تھا، لیکن انہیں جمعرات کو ویمبلے میں انگلینڈ کے خلاف ہونے والے یونان کے نیشنز لیگ میچ کے لیے منتخب نہیں کیا گیا تھا۔ انگلینڈ اور مانچسٹر یونائیٹڈ کے ڈیفنڈر ہیری میگوائر، جو شیفیلڈ یونائیٹڈ کے سابق کھلاڑی بھی ہیں، نے انسٹاگرام پر بالڈاک کی تصویر کے ساتھ ٹوٹے دل کا ایموجی اور ریسٹ ان پیس لکھا۔
یونانی ٹیم نے فیس بک پر لکھا: “ہم گہرے دکھ اور درد کے ساتھ قومی ٹیم اور ہیلینک فٹ بال فیڈریشن کے ڈیفنڈر جارج بالڈاک کو الوداع کہہ رہے ہیں۔”
ہمارے نوجوان کھلاڑی کی بے وقت موت کی خبر نے ہمیں شدید صدمے میں مبتلا کر دیا ہے۔ ان کے خاندان اور ساتھی کھلاڑیوں سے دلی تعزیت۔ الوداع۔
