اسرائیلی اخبار یروشلم پوسٹ نے عمران خان کو اسرائیل کا حمایتی قرار دیدیا
اردو انٹرنیشنل (مانیٹرنگ ڈیسک) اسرائیلی اخبار یروشلم پوسٹ کے ایک آرٹیکل میں بانی پی ٹی آئی کو اسرائیل کا حمایتی قرار دیا گیا ہے۔
آرٹیکل میں لکھا گیا ہے کہ سابق وزیراعظم عمران خان اسرائیل مخالف بیان دینے کے باوجود اسرائیل سے بہتر تعلقات کے اشارے دیتے رہے، عمران خان اسرائیل کے لیے ہم خیال سیاستدان ہیں اور ان کی انتخابات میں کامیابی پاک اسرائیل تعلقات کاازسرنوجائزہ لینےکاموقع ہے۔
اسرائیلی اخبار کے آرٹیکل میں کہا گیا کہ اسرائیل دوست خارجہ پالیسی کے اسٹریٹجک فوائد ہیں لیکن پاکستان کی فوجی اسٹیبلشمنٹ سے مزاحمت کا سامنا ہے، فوجی اسٹیبلشمنٹ نے طویل عرصہ اسرائیل کےساتھ تعلقات کومعمول پر آنے سے روکا اس لیے اسرائیل سے تعلقات کے لیے پاکستان کی موجودہ سیاسی قیادت کو بدلنا ہوگا کیونکہ عمران خان اسرائیل کے حمایتی اور اسٹیبلشمنٹ و سیاسی قیادت کے مخالف ہیں۔
آرٹیکل کے مطابق اسرائیل سے تعلقات میں عمران خان کا کردار کلیدی ہو گا کیونکہ وہ عوامی رائے اور فوجی پالیسی تبدیل کرنےمیں کردار اداکر سکتے ہیں جبکہ ڈونلڈ ٹرمپ کی وائٹ ہاؤس میں واپسی پاک اسرائیل تعلقات کی بحالی تیزکر سکتی ہے اور ٹرمپ انتظامیہ سفارتی، معاشی فوائد سے پاکستان جیسے ممالک کی حوصلہ افزائی کر سکتی ہے۔
آرٹیکل میں کہا گیا ہے کہ اسرائیل کو تسلیم کرنے سے پاکستان کو اہم اقتصادی فوائد حاصل ہو سکتے ہیں، اسرائیل سے تعلقات سے پاکستان کو زراعت، سائبر سکیورٹی، دفاع اور مالی سرمایہ کاری جیسے فوائد حاصل ہو سکتے ہیں۔
اس کالم پر وفاقی وزیر احسن اقبال نے رد عمل دیتے ہوئے کہا کہ اسرائیلی اخبار کے مطابق بانی پی ٹی آئی پاکستان میں واحد قابل قبول شخص ہیں، لوگ اب سمجھ گئے ہیں کہ پروجیکٹ بانی پی ٹی آئی کے پیچھے کون ہے۔
انہوں نے کہا کہ بانی پی ٹی آئی نے اسلامی ٹچ دے کر عوام میں اپنا تشخص قائم کیا، جس کا مقصد پاکستان اور اسرائیل کے تعلقات استوار کرنا ہے، حال ہی میں اسرائیل کے میڈیا میں بانی پی ٹی آئی کے حق میں تیسرا آرٹیکل شائع ہوا ہے، یروشلم پوسٹ میں شائع مضمون بانی پی ٹی آئی کے حق میں عالمی میڈیا میں جاری مہم کا حصہ ہے۔
پاکستان مسلم لیگ (ن) کی ہی حکومت پنجاب کی سینئر وزیرِ مریم اورنگزیب نے اسرائیلی اخبار کے آرٹیکل پر ردعمل میں کہا کہ یروشلم پوسٹ نے بانی پی ٹی آئی کا دوغلا پن اور تضادات کا پہلو بے نقاب کردیا، اخبار کی باتیں آنکھیں کھول دینے والی ہیں۔
سماجی رابطے کے پلیٹ فارم ایکس پر مریم اورنگزیب نے کہا کہ ثابت ہوگیا کہ بانی پی ٹی آئی اسرائیل سے معمول کے تعلقات چاہتے تھے۔
وفاقی حکومت کی اتحادی پاکستان پیپلز پارٹی کی حکومت سندھ کے سینئر وزیر شرجیل میمن نے یروشلم پوسٹ کے انکشافات کو افسوسناک قرار دیا اور کہا کہ اگر اسرائیل سمجھتا ہے کہ بانی پی ٹی آئی ان کے لیے بہتر ہیں تو قوم کو سوچنا چاہیے۔
شرجیل میمن نے یروشلم پوسٹ کے آرٹیکل پر ردعمل دیا کہ بانی پی ٹی آئی کےتانے بانے سامنے آرہے ہیں۔ اسرائیل بانی پی ٹی آئی کے اقتدار کو اپنے لیے مفید سمجھتا ہے۔ انہوں نے دعویٰ کیا کہ لندن میئر کے الیکشن میں بانی پی ٹی آئی نے پاکستانی نژاد شہری کیخلاف مہم چلائی۔
