یومِ آزادی پاکستان:ورلڈ ٹریڈ سنٹر دبئی میں رنگا رنگ تقریب ،ہزاروں لوگوں کی شرکت
پاکستان کے یوم آزادی پردبئی کے ورلڈ ٹریڈ سینٹر میں ’’امارات لوز پاکستان‘‘ کے زیر اہتمام تقریب میں 10 ہزار سے زیادہ افراد نے شرکت کی۔
متحدہ عرب امارات کی نیوز ایجنسی وام کے مطابق متحدہ عرب امارات کے وزیر رواداری و بقائے باہمی، شیخ نہیان بن مبارک النہیان نے پاکستان کے سفیر فیصل نیاز ترمذی،متعدد معززین اور سفارت کاروں کے ہمراہ پاکستان کے 77ویں یوم آزادی کے حوالہ سے شاندار تقریب میں شرکت کی۔
تقریب کا اہتمام متحدہ عرب امارات کے سرکاری میڈیا دفتر نے ’’امارات لووز پاکستان‘‘ پیج، پاکستان ایسوسی ایشن دبئی، دبئی پولیس اور دبئی ورلڈ ٹریڈ سینٹر کے تعاون سے کیا تھا۔اس موقع پر شیخ نہیان بن مبارک النہیان نے متحدہ عرب امارات اور پاکستان کے گہرے تعلقات کو اجاگر کرتے ہوئے دونوں ممالک کے درمیان تعلقات کو فروغ دینے اور مضبوط کرنے کے عزم پر زور دیا۔
شیخ نہیان بن مبارک النہیان نے کہا کہ ہمارے ثقافتی، سیاسی، تجارتی اور عوامی روابط کی جڑیں مشترکہ اقدار اور عقائد میں پیوست ہیں اور ہمارے قریبی تعلقات کے لئے ایک مضبوط اور مستحکم بنیاد فراہم کرتی ہیں۔ ہم دنیا کے تمام حصوں میں ترقی اور امن کے حصول کی امید اور پختہ عزم رکھتے ہیں ،ہم عالمی امور میں پاکستان اور متحدہ عرب امارات دونوں کی ابھرتی ہوئی اور بڑھتی ہوئی ساکھ اور کردار سے فائدہ اٹھانے کے لیے پرعزم ہیں۔شیخ نہیان بن مبارک آل نہیان نے شرکا سے مخاطب ہو کر کہا کہ آپ کے ملک کے 77 ویں یوم آزادی کے اس خاص موقع پر، ہم متحدہ عرب امارات میں پاکستان کے عوام کے ساتھ مل کر اپنے ممالک، اپنے خطے اور دنیا کے مستقبل کے لئے امید کا اظہار کرتے ہیں۔ ہم متحدہ عرب امارات میں اپنے پاکستانی بھائیوں اور بہنوں کے ساتھ مل کر خطے اور عالمی سطح پر ترقی اور خوشحالی کے حصول کے لیے کام کرنے پر فخر محسوس کرتے ہیں۔
Ambassador Faisal Niaz Tirmizi, Pakistan’s Envoy to the UAE, Consul General Hussain Muhammad, Jahangir Khan, the legendary Pakistani squash player, representatives of Pakistan Association Dubai at the inauguration of the biggest Independence Day’s Celebrations in UAE held in the… pic.twitter.com/a1K4ZddUUl
— Pakistan Embassy UAE (@PakinUAE_) August 11, 2024
اس تقریب میں پاکستان کے بھرپور ثقافتی ورثے کو دکھایا گیا، جس میں روایتی موسیقی اور رقص سمیت مختلف پرفارمنس کے ساتھ ساتھ پاکستانی دستکاری کی نمائش بھی شامل تھی۔ اس پروگرام میں پائیدار ترقی کو فروغ دینے میں ان کے کردار سمیت متحدہ عرب امارات کی ترقی میں پاکستانی برادری کی خدمات کو بھی سراہا گیاہے۔اس موقع پر متحدہ عرب امارات کے سرکاری میڈیا آفس کی ڈپٹی چیئرپرسن عالیہ الحمادی نے کہا کہ یہ جشن متحدہ عرب امارات اور اسلامی جمہوریہ پاکستان کے درمیان گہرے تاریخی تعلقات اور اسٹریٹجک شراکت داری کی عکاسی کرتا ہے۔ عالیہ الحمادی نے بتایا کہ دونوں ممالک کے درمیان تعاون مختلف شعبوں میں پھیلا ہوا ہے، اور اس بات پر روشنی ڈالی کہ متحدہ عرب امارات بڑے منصوبوں کے نفاذ کے ذریعے پاکستان میں پائیدار ترقی کی حمایت کرنے کا خواہاں ہے۔
ایک خصوصی تقریب میں، شیخ نہیان بن مبارک النہیان نے مختلف شعبوں میں ان کی نمایاں خدمات کے لیے کئی معزز پاکستانی شخصیات کو اعزاز ات دیئے ہیں۔ان شخصیات میں پاکستان ایسوسی ایشن دبئی کے صدر ڈاکٹر فیصل اکرامبھی شامل تھے، جنہیں بیرون ملک مقیم پاکستانیوں کے لیے سب سے بڑا کمیونٹی سینٹر قائم کرنے کی ان کی کوششوں پر سراہا گیا۔ ایسوسی ایشن کا میڈیکل سینٹر، جو جی سی سی میں پہلی غیر منافع بخش صحت کی دیکھ بھال کی سہولت ہے، نے اپنے آغاز سے ہی ہزاروں لوگوں کو سستی صحت کی دیکھ بھال فراہم کی ہے۔دیگر قابل ذکر شخصیات میں ڈاکٹر یارجن عبدالصمد شامل ہیں، جو خلیفہ یونیورسٹی، متحدہ عرب امارات میں ایرو اسپیس انجینئرنگ کے اسسٹنٹ پروفیسر اور یونیورسٹی آف کیمبرج میں سینئر ریسرچ ایسوسی ایٹ اور سینئر ٹیچنگ فیلو ہیں۔ ان کا تحقیقی کام خلا اور ایرو اسپیس کے لیے گرافین اور 2 ۔ڈی مواد پر مبنی ٹیکنالوجیز تیار کرنے پر مبنی ہے.
وہ یورپی خلائی ایجنسی (ای ایس اے ) کی زیرو گریوٹی پروازوں پر سائنسدانوں کی ٹیم میں شامل تھے جنہوں نے مائیکرو گریوٹی میں گرافین کی پہلی بار جانچ کی تھی۔معروف راوی ریسٹورنٹ کے بانی شیف چوہدری عبدالحمید کو دبئی کے کھانوں کے منظر نامے پر ان کے اثرات کی وجہ سے بھی تسلیم کیا گیا، ان کے ساتھ ہی کبسنز کی شریک بانی حلیمہ جمانی کو بھی اعزاز دیا گیا جنہوں نے متحدہ عرب امارات کی گروسری مارکیٹ میں برانڈ کو ایک معروف نام کے طور پر قائم کرنے میں اہم کردار ادا کیا ہے۔اس کے علاوہ، کریم کے شریک بانی مدثر شیخہ کو خطے میں ٹرانسپورٹیشن کے شعبے میں انقلاب لانے پر اعزاز دیا گیا۔ نور(این او آر آر ) کے صدر اور ڈیزائن ڈائریکٹر یحییٰ جان کو فن تعمیر میں ان کی خدمات کے لیے اعزاز سے نوازا گیا، جس میں “سیئل ٹاور” کا ڈیزائن بھی شامل ہے جو دنیا کا بلند ترین ہوٹل بننے والا ہے۔
تقریب میں معروف پاکستانی ایتھلیٹس کو بھی خراج تحسین پیش کیا گیا جن میں نائلہ کیانی بھی شامل تھیں جو 8 ہزار میٹر سے زیادہ بلند 14 میں سے 11 چوٹیاں سر کرنے والی پہلی پاکستانی خاتون تھیں۔ کرکٹ لیجنڈ شاہد آفریدی کو بھی ان کے ریکارڈ توڑ کارناموں اور خیراتی کام کے لیے اعزاز سے نوازا گیا۔ سکواش چیمپئن جہانگیر خان اور ہاکی سٹار شہباز احمد کو بھی ان کے شاندار کھیلوں کے کیریئر کے لیے ایوارڈ دیاگیا۔
متحدہ عرب امارات اور پاکستان کے درمیان دیرینہ تعلقات ہیں، جو اسٹریٹجک شراکت داری اور بڑھتے ہوئے اقتصادی تعلقات سے مضبوط ہیں۔ مرحوم شیخ زاید بن سلطان النہیان کی طرف سے 1971 میں اپنے قیام کے بعد سے، متحدہ عرب امارات پاکستان میں ترقی کا ایک بڑا حامی رہا ہے۔ اس شراکت داری میں نمایاں سرمایہ کاری شامل ہے، جس میں متحدہ عرب امارات نے حال ہی میں پاکستان میں امید افزا شعبوں کے لیے 10 بلین امریکی ڈالر کی رقم مختص کی ہے۔
