بی سی سی آئی نے چیمپئنز ٹرافی 2025 کے لیے پاکستان کا سفر نہ کرنے کی افواہوں کو مسترد کر دیا
اردو انٹرنیشنل (اسپورٹس ڈیسک ) تفصیلات کے مطابق بورڈ آف کنٹرول فار کرکٹ ان انڈیا (بی سی سی آئی) کے نائب صدر راجیو شکلا نے ہفتے کے روز ان دعوؤں کو مسترد کر دیا کہ مین ان بلیو اگلے سال آئی سی سی چیمپئنز ٹرافی کے لیے پاکستان کا سفر نہیں کریں گے۔
اس سے قبل بھارتی میڈیا کی رپورٹس میں دعویٰ کیا گیا تھا کہ بی سی سی آئی چیمپئنز ٹرافی کے لیے اپنی ٹیم پاکستان نہیں بھیجے گا یہ بھی بتایا گیا کہ ہندوستان آئی سی سی سے اپنے میچوں کو غیر جانبدار مقام پر منتقل کرنے کو کہے گا۔
شکلا نے فون پر دی پرنٹ کو بتایا کہ ہم نہیں جانتے کہ کس ذریعہ نے ایسی معلومات دی ہیں بی سی سی آئی نے اس بارے میں کوئی باضابطہ معلومات نہیں دی ہیں.
بھارت نے 2008 کے بعد سے پاکستان کا سفر نہیں کیا اور دونوں ممالک کے درمیان آخری دو طرفہ سیریز 2013 میں ہوئی تھی تب سے، دونوں ٹیموں کے درمیان میچز بنیادی طور پر انٹرنیشنل کرکٹ کونسل کے ٹورنامنٹس اور ایشیا کپ تک محدود ہیں۔
واضح رہے کہ پاکستان کرکٹ بورڈ (پی سی بی) نے اس کے لیے 20 کروڑ روپے مختص کیے ہیں اگلے سال فروری/مارچ میں شیڈول آئی سی سی چیمپئنز ٹرافی سے قبل تین ا سٹیڈیم کی اپ گریڈیشن کے لیے 12.80 بلین روپے رکھے گئے ہیں.
چیمپئنز ٹرافی کی مجوزہ تاریخیں 19 فروری سے 9 مارچ تک ہیں۔
