عوامی نیشنل پارٹی کا عام انتخابات کے نتائج مسترد کرنے کا اعلان
عوامی نیشنل پارٹی کا عام انتخابات کے نتائج مسترد کرنے کا اعلان
اردو انٹرنیشنل (مانیٹرنگ ڈیسک ) عوامی نیشنل پارٹی نے عام انتخابات میں بدترین دھاندلی کے الزامات عائد کرتے ہوئے نتائج مسترد کرنے کا اعلان کردیا۔
صدر اے این پی خیبرپختونخوا ایمل ولی خان نے پریس کانفرنس کرتے ہوئے کہا کہ 8 فروری کے انتخابات بدترین تھے اور لوگ انتخابات کے نتائج سے پہلے ہی آگاہ تھے۔
ایمل ولی خان کا کہنا تھا کہ بلوچستان کی طرح خیبرپختونخوا میں بھی کمزور لوگ لائے گئے اور کٹھ پتلی وزیراعلیٰ لانے کے لیے سیاسی شخصیات کو باہر کیا گیا۔
انہوں نے کہا کہ پنجاب میں آزاد امید واروں کو الگ ٹریٹ کیا گیا تاکہ نواز حکومت بنے جبکہ خیبرپختونخوا میں آزاد امیدواروں کے ساتھ کمپرومائز کیا گیا اور سمجھوتہ کرنے والے امیدواروں کو ریلیف دیا گیا ہے۔
ایمل ولی نے مطالبہ کیا کہ خیبرپختونخوا کے تمام حلقوں کو میڈیا کے سامنے کھولا جائے اور عوامی نیشنل پارٹی جہاں دوسرے نمبر پر تھی وہاں کے حلقے میڈیا کے سامنے کھولے جائیں۔
انہوں نے کہا کہ کون وزیراعظم ہو گا یہ بھی عوام کو پتا تھا اور پی ٹی آئی کے وزارت اعلیٰ کے امیدواروں کو بھی ہرایا گیا۔
ایمل ولی نے دعویٰ کیا کہ ریٹرننگ افسران نے کروڑوں روپے کا مطالبہ کیا اور اس حوالےسے ثبوت موجود ہیں جو وقت آنے پر سامنے لائے جائیں گے۔
ان کا کہنا تھا کہ کروڑوں روپے کےعوض انتخابات میں حصہ لینے والوں نے اپنی سیٹ بچائی ہے جبکہ الیکشن کے دن نیٹ ورک ڈاؤن کیے جانے کی بھی تحقیقات کی جائیں۔
