امریکی ایکزم بینک کا ریکو ڈک کے لیے 1.25 ارب ڈالر قرض دینے کا اعلان
اردو انٹرنیشنل (مانیٹرنگ ڈیسک) ڈان نیوز کے مطابق امریکی ایکسپورٹ امپورٹ (ایگزِم) بینک کے سربراہ نے کہا ہے کہ ادارہ پاکستان میں بیریک مائننگ کی ریکو ڈک کان کے لیے 1.25 ارب ڈالر کا قرض فراہم کرے گا۔ یہ سرمایہ کاری اُس بڑے منصوبے کا حصہ ہے جس کے تحت امریکہ اور اس کے اتحادی ممالک کے لیے اہم معدنیات، جوہری توانائی اور قدرتی گیس کی سپلائی چینز مضبوط بنانے کے لیے 100 ارب ڈالر تک کی سرمایہ کاری کی جائے گی۔
ایف ٹی کو دیے گئے ایک انٹرویو میں بینک کے چیئرمین جان یووانووِچ نے بتایا کہ منصوبے کے پہلے مرحلے میں پاکستان، مصر اور یورپ کے پروجیکٹس شامل ہوں گے۔ انہوں نے کہا کہ مغربی ممالک اُن سپلائی چینز پر ضرورت سے زیادہ انحصار کرتے رہے ہیں جو اب “منصفانہ” نہیں رہیں۔
یووانووچ کے مطابق ہم جو کچھ کرنے کی کوشش کر رہے ہیں وہ اس وقت تک ممکن نہیں جب تک بنیادی خام مال کی سپلائی چینز محفوظ، مستحکم اور فعال نہ ہوں۔
انہوں نے مزید بتایا کہ بینک کے پاس ابھی بھی 135 ارب ڈالر کی کانگریسی منظوری میں سے 100 ارب ڈالر خرچ کرنے کے لیے موجود ہیں۔ ابتدائی منصوبوں میں نیویارک کی کموڈیٹیز کمپنی ہارٹری پارٹنرز کی جانب سے مصر کو فراہم کی جانے والی 4 ارب ڈالر مالیت کی قدرتی گیس کے لیے کریڈٹ انشورنس گارنٹی بھی شامل ہوگی۔
امریکی ایکزم بینک نے اس معاملے پر تبصرہ کے لیے کی جانے والی درخواست کا جواب نہیں دیا۔
