Abhishek Sharma equals an Indian player's unwanted record-AFP
بھارتی کرکٹ ٹیم کے اوپنر بلے باز ابھیشیک شرما کو معدے کے انفیکشن کے باعث نئی دہلی کے ایک نجی ہسپتال میں داخل کر دیا گیا ہے، جس کے بعد نمیبیا کے خلاف ٹی20 ورلڈ کپ میچ میں ان کی شرکت مشکوک ہو گئی ہے۔
بھارتی میڈیا رپورٹس کے مطابق ابھیشیک امریکا کے خلاف میچ سے قبل ہی طبیعت کی خرابی کا شکار تھے، تاہم میچ کھیلنے کے بعد ان کی حالت مزید بگڑ گئی ذرائع کا کہنا ہے کہ انہیں تیز بخار تھا اور فوری طور پر طبی امداد کے طور پر ڈرپس لگائی گئیں وہ ارون جیٹلی اسٹیڈیم میں ہونے والے پریکٹس سیشن میں بھی شریک نہیں ہوئے۔
امریکا کے خلاف میچ میں ابھیشیک پہلی ہی گیند پر آؤٹ ہو گئے تھے جبکہ فیلڈنگ کے دوران بھی میدان میں واپس نہیں آئے، ان کی جگہ سنجو سیمسن نے ذمہ داریاں سنبھالیں وہ میچ کے بعد ہاتھ ملانے کی تقریب میں بھی شریک نہیں ہوئے تھے۔
بھارتی ٹیم کے اسسٹنٹ کوچ ریان ٹین ڈوشیٹ نے کہا ہے کہ ابھیشیک کو پیٹ کے مسائل درپیش ہیں اور امید ہے کہ وہ دو روز میں صحت یاب ہو جائیں گے تاہم بی سی سی آئی کے ایک اہلکار کے مطابق نمیبیا کے خلاف میچ میں ان کی شرکت تاحال غیر یقینی ہے۔
دوسری جانب واشنگٹن سندر نے اسکواڈ کو جوائن کر لیا ہے جبکہ جسپریت بمراہ بھی 10 روزہ وقفے کے بعد دوبارہ بولنگ شروع کر چکے ہیں اور پہلے سے بہتر محسوس کر رہے ہیں ٹیم انتظامیہ کو امید ہے کہ اہم کھلاڑی جلد مکمل فٹنس حاصل کر لیں گے۔
