T20 Tri-Series: Pakistan defeats Zimbabwe to qualify for final-PCB
راولپنڈی میں کھیلے گئے ٹی20 ٹرائی نیشن سیریز کے چوتھے میچ میں پاکستان نے زمبابوے کو 69 رنز سے شکست دے کر ایونٹ کے فائنل میں اپنی جگہ پکی کر لی۔
گرین شرٹس اب تک ایونٹ میں ناقابلِ شکست ہیں اور تینوں میچوں میں کامیابی حاصل کر چکے ہیں، جبکہ فائنل میں ان کے مدمقابل آنے والی ٹیم کا فیصلہ سری لنکا اور زمبابوے کے میچ کے بعد ہوگا۔
196 رنز کے ہدف کے تعاقب میں زمبابوے کی ٹیم 19 اوورز میں 126 رنز پر ڈھیر ہو گئی۔
پاکستان کی جانب سے عثمان طارق نے شاندار بولنگ کا مظاہرہ کرتے ہوئے ہیٹ ٹرک سمیت 4 وکٹیں حاصل کیں، جبکہ محمد نواز نے 2 شکار کیے زمبابوے کے ریان برل نے 67 رنز کی ناقابلِ شکست اننگز کھیل کر کچھ مزاحمت ضرور دکھائی۔
اس سے قبل پاکستان نے پہلے بیٹنگ کرتے ہوئے 5 وکٹوں کے نقصان پر 195 رنز اسکور کیے بابر اعظم 74 رنز کے ساتھ ٹاپ اسکورر رہے جبکہ صاحبزادہ فرحان نے 63 رنز بنا کر مسلسل دوسری نصف سنچری اسکور کی۔ دونوں نے دوسری وکٹ پر 103 رنز کی اہم شراکت قائم کی۔
اختتامی اوورز میں فخر زمان نے 27 رنز کی تیز رفتار اننگز کھیل کر مجموعے کو مضبوط کیا۔
